Takornariartitsisartup Disko Line unammilleqatigiinnermik innarliisuunerarpaa

Takornariartitsisartoq Nick Nielsen isumaqarpoq, Disko Linep Namminersorlutik Oqartussat aningaasaliisoralugit takornariartitsisarfiit mikinerit unammillerai. Kiffartuussinissamik isumaqatigiissummut aningaasartaliussat ingerlaarfiinnarnut atugassiaasut, Disko Linemit oqaatigineqarpoq.

Disko Line sullitassanik ilaasoqaraangat, takornariartitsisarfinnut mikinerusunut kingunerlutsitsisarpoq, Nick Nielsen naligiiinngitsumik unammilleqatigiittoqartoq isumaqartoq oqarpoq.

Naalakkersuisut ilaasunik angallassisarnermut tapiissuteqartarnerat najukkani takornariartitsisartunut akornusiisarpa? Taamatut isumaqarpo,Nick Nielsen Ilulissani takornariartitsisarfiuteqarlunilu Avannaata Kommuniani kommunaldirektøriusoq.

Nick Nielsenip qanittukkut takornarianik angallassinermini misigisimasani innersuussutigaa:

- Uterluta ingerlaarnitsinni Disko Linep angallataataa takornarianik ulikkaartoq naapipparput. Ingerlatseqatigiiffimmut soorunami tamanna pitsaasuuvoq, taakku sinnerlugit nuannaarpunga. Isumaqarpungali naligiinngitsumik piumasaqaateqarnikkut atugassaqartitsinikkullu unammilleqatigiittoqartoq.

Pisortaaneq isumaqataanngitsoq

- Disko Line ilaasunik angallassinissaq eqqarsaatigalugu kiffartuussinissamut isumaqatigiissutigineqarsimavoq, tassungalu atatillugu Qeqertarsuup tunuani najugaqarfiit tamarmik kiffartuunneqarnissaanut aningaasarpassuarnik tunineqarsimalluni. Suliffeqarfik aningaasarpassuit atorlugit angallatinik anginerusunik pisiaqarsimavoq, ilaasunik angallassineq siunertarisaq malillugu ingerlanneqarniassammat. Isumaqarpunga, Disko Line pisortat aningaasaataat atorlugit takornariartitsisarnermi unammillertussaanngitsoq, aningaasaliissutigisammi kiffartuussinissamik isumaqatigiissutip imaanut atortussaammata, Nick Nielsen allappoq.

Disko Linemi pisortaanerup Noelle Simoudip isornartorsiut isumaqatiginagu Sermitsiaq.AG-mut oqaatigaa.

- Kiffartuussinissamik isumaqatigiissut aningaasaliiissutillu illoqarfiit nunaqarfiillu Kiffartuussinissamik isumaqatigiissummi pineqartut akornanni ilaasunik angallassinissamuinnaq atugassiaapput. Kiffartuussinissamik isumaqatigiissutip naatsorsorneqarnerani, kiffartuussinissamik isumaqatigiissummut atatillugu ingerlatsinermut aningaasartuutaasussat kisimik ilanngunneqarsimapput, pisortaaneq allakkatigut akissuteqarluni oqarpoq.

Qeqertarsuup Tunuani angallatit aqqaneq-marluk

Pisortaanerup oqaatigaa, Disko Line ullumikkut Qeqertarsuup Tunuani aqqaneq-marlunnik angallataateqartoq, taakkulu 30 procentii piffissami 15/5-15/11-mi Qeqertgarsuup Tunuani ingerlaarfissatut pilersaarutaareersunut atugassiaasut.

Naalakkersuisut 2016-imi kiffartuussiveqarfinni silaannakkut imaatigullu angallassisoqartarnissaanik aalajangernerannut atatillugu Disko Line ilaasunik angallassisarnissamut kiffartuussinissamik isumaqatigiissuteqarfigineqarpoq. Imaatigut angallassisarneq siusinnerusumut sanilliullugu initunerulersimavoq.

2020-p naanerani nutaanik isumaqatigiissuteqartoqarpoq, tassani Disko Line toqqarneqarluni. Isumaqatigiissutit taakku ukiuni qulini atuuttussaapput.

Pisortaaneq: Imaatigut angallatit amigaataareersut

Pisortaanerup oqaatigaa, Disko Linep ingerlatseqatigiiffik Disko Line Explorer aqqutigalugu attartortitsisarnissamik takornariartitsisarnissamillu neqerooruteqartartoq, pisortaanerlu isumaqarpoq, Qeqertarsuup Tunuani takornariartitsisartunut tamanut inissaqartoq.

- Ukioq manna 2022-mi takornariarusuttorpassuaqartoq aamma angallassisinnaasunik amigaateqartoqartoq takusareerparput. Isumaqarpugut, tunisassiamik pitsaasunik tunniusserusuttunut tamanut inissaqartoq.

- Disko Line Explorer aamma neqeroorteqartartut akisunerpaat ilagaat, takornariatitsisartunillu allanik ingiaarusunngilaq. Disko Linemit kissaatigineqarpoq, ukiut Coronap atuuffiisa qaangiunneranni tigussaasumik takornariartitsisoqartalissasoq, tassani isumannaatsuunissaq, pitsaasunik misigisaqartitsinissaq, isumassarsiortarneq suleqatigiinnerlu Kalaallit Nunaanni takornariartitsisarnermik pitsanngorsaataajumaartut kissaatigineqarluni, Noelle Simoud oqarpoq.

Nick Nielsenip aamma Naalakkersuisut Disko Linemut aningaasaliissuteqarsimasut isornartorsiorpai. Sermitsiaq.Ag-mit Naalakkersuisut isornartorsiuinermut oqaaseqartinniarneqarput.

Powered by Labrador CMS