Takornariartitsisartoq takornariartitsisartoqatiminit kusanartumik nersornaaserneqartoq
Lars Peter Anker Møller Tununumi suliffeqarfimmik Arctic Dreamimik pilersitsisoq Greenland Tourismip 2019-imut nersornaataanik nersornaaserneqarpoq.
Visit Greenland, Air Greenland Greenland Businessilu immikkut ilisimasalittut, inuit piujuartitsineq, pitsaassuseq, isumannaassuseq, avatangiisit pinngortitarlu tunngavigalugit kiisalu najukkami innuttaasunik peqataatitsisumik nutaaliortumillu ingerlatsisut akornanni kina nersornaaserneqassanersoq nassaariniarsimavaat.
Air Greenlandimi pisortap Jacob Nitter Sørensenip erseqqissaatigaa, inuussutissarsiuteqartut namminneq suliffeqarfik Arctic Dream pilersitsisualu Lars Peter Anker Møller toqqarsimagaat.
Akisussaassuseqarneq
2007-imili Arctic Dreamimi, Lars Anker Møller siuttoralugu, immikkut ilisimasaqarfigalugit uku Tunumi aallunneqalersimapuut qimusserneq, piniarneq, imaatigut angalaneq, qajartorneq, aalisarneq qaqqasiornerlu. Arctic Dreamimi sullitap misigisaqarnissaa, paasissutissiisarneq akisussaassuseqarnerlu immikkut eqqumaffigineqartarput, Visit Greenlandip Air Greenlandillu ataatsimut tusagassiorfinnut nalunaarutaanni allassimavoq.
- Nersornaat uannuinnaanngilaq, suliffeqarfimmi sulisunut tamanut nersornaataavoq, Lars Peter Anker Møller erseqqissaavoq, nangillunilu:
- Taakkoqanngippat Arctic Dreameqarnavianngikkaluarpoq. Maani najukkatsinni takornariartitsisarnerup iluani ilinniartitsineq ineriartortitsinerlu suliarisarput aamma sullitatsinnit pissarsiavut atorluartarpavute. Nersornaat suliniutit suli amerlanerit aallartinneqarnissaannut kivitsissutaassaaq.
Piujuartitsineq
Visit Greenlandimi pisortaq nersornaasiineq pillugu oqarpoq:
- Takornariartitsinermi piujuartitsineq tassaavoq, takornariartitsisartut najukkami suliffissanik qanoq pilersitsinnaanersut, Kalaallit Nunaanni pinngortitaq isumalluutillu eqqarsaatigalugit ineriartortitsisoqarnersoq kiisalu isumannaallisaaneq isiginiarluarneqarnersoq.