Takornariartitsinermik inuussutissarsiortut kingornussassaq periarfissarpassuaqarnerarpaat
Aasivissuit-Nipisat nunarsuarmioqatigiit eriagisassatut kingornussassanngortinneqarnera sumiiffimmi takornariaqarnermut siuarsaataasinnaasoq, Destination Arctic Circle isumaqarpoq.
Ukiut arlallit angusassamik toraagalerluni suliniuteqarnerup kingorna, sapaatip-akunnerata naanerani Aasivissuit-Nipisat UNESCO-p Nunarsuarmi kingornussanut eriagisarialinnut akuerineqarnera iluatsippoq.
Taamatullu akuersissuteqartoqarnera sumiiffimmi takornariartitsinermik inuussutissarsiortunit nuannaarutigineqarpoq.
- Arctic Circle Businessimiik qilanaaraarput UNESCO ulluinnarni suliatsinnut ilaatilissallugu, Aasivissuit – Nipisat kiisalu the Big Arctic Five (Inuit, arsarnerit, sermeq, qimusseq kiisalu arferit) tamaasa nunatami misigineqarsinnaammata. Tamannalu ornigassatut inissisimanitsinnut nukittorsaataassaaq, Destination Arctic Circlemi pisortaq Juliane Henningsen tusagassiuutinut nalunaarummi allappoq.
Nunarsuarmi kingornussassanngortitsineq sumiiffiup inuit ukiuni 4.500-ni piniarfittut atugarimmassuk pivoq. Taannalu oqaluttuaq takornariaqarnerup ineriartortinneqarneranut nukittorsaataasinnaasoq, Juliane Henningsen isumaqarpoq.
- Aasivissuit – Nipisat nunarsuarmi eriagisassatut ilanngunneqarnera siunissami nunatta qanga massakkullu piniarnermik aalisarnermillu oqaluttuarisaanerata oqaluttuarinissaanut isumalerujussuussaaq.
Nunarsuarmi kingornussassaq takornarissanik assigiinngitsunik pilerisutsitsisinnaasoq taanna isumaqarpoq, soorlu misigisassarsiorluni takornariaqarneq qajartornermi, umiamik qimussinillu angalaarluni, qamuteralannik, fatbikenik, ujakkaarutinik, nunakkut pisulluni aammalu sakkortuumik arpalluni misigisassarsiorluni takornariarfiusinnaasutut piukkunnaateqarpoq.
Kisianni aamma takornarissanut misigisassarsiorpallaanngitsunut periarfissaqarpoq.
- Sisimiuni Kangerlussuarmilu umiarsuarmik takornariartaatinik takornariat qilanaarutissaqalerput nutaanik pissanganartunillu UNESCO-mik aallaaveqartunik misigisassaqaleramik, immikkuullarissumik Nipisat qeqertaanut angalaarnernut, qangarnisanik qimatanik ulikkaartumut, aammalu nunaqarfik eriagisassatut ilanngunneqartumut ilaasumut Sarfannguanut.
- Sarfannguit tassaalissaaq inuiannik nukittuunik naapitsivissaq, inuiaat qangarsuaq periutsit malillugit inuusut taaamatulli ullutsinnut malinnaasut. Tamaani suli Aasivissuit – Nipisat nunataanni inuussuteqarput, taamaattumillu maanna periarfissarujussuarmik pissarsillutik, Sarfannguit piorsarsimassutsikkut misigisassatigut takornarissanut aqqutissiuissammat, periarfissaqalissammat Sarfannguani piniariaatsinik piniartarfinnillu ukiunik 4000-inik pisoqaassusilinnik takutitsiviusinnaalissammat, ullumikkut suli atugaasunik.