Takornariartaatilerisut: Kalaallit Nunaat akikippallaaqaaq

Nunarput akikippallaaqaaq.

Umiarsuarnik takornariartaatinik sullissisut taama oqariartuuteqarput. Taakku isumaqarput takornarialerinerup iluani akitsuutit aaqqissuuteqqinneqartariaqartut, talittarfiit sullissisullu pitsaanerulernissaanut aningaasat amerlanerusut isaatinneqalerniassammata.

Umiarsuit sinersorlutik takornariartaatit akitsuutinik annertunerusunik akiliinissamut akuersisinnaasorineqarput, tikiffissani atortut pitsaanerulersinnaappata.

Visit Greenlandip misissuinermit saqqummiineranit innersuussutit ilaat taama allassimavoq. MIsissuititsineq ukioq aallartinneqarpoq, umiarsuit takornariartaatit sullinneqarnerini unammillernartut periarfissallu qulaajarniarneqarlutik.

- Sammisami soqutigisat assigiinngisitaartut ersersinniarneri, aammalu piujuaannartitsineq tunngavigalugu ineriartortitsinissamut suleqatigiinnerit eqaannerulersinnissaannut isumassarsinissaq siunertaavoq, Visit Greenlandimi pisortaq, Anne Nivíka Grødem oqarpoq.

Sinersorlutik takornariat assigiinngitsut

Takornariartaatit anginerit minnerillu pillugit isummat assigiinngitsorpassuusinnaasut, misissuinermi paasineqarpoq.

Suliffeqarfiit aperineqartut amerlanerpaasa takornariartaatit mikinerusut, ikinnerusunillu ilaasoqartut pileriginerusarpaat. Taama ittuni takornariartut sivisunerusumik nunamiittarput, najukkami nioqqutissanik pisinerusarput tikitaminnullu ataqqinninnerusarlutik.

Suliffeqarfiit allat nassuiaapput umiarsuit anginerusut soqutigalugit, sullitassat amerlanerummata, isertitassatut periarfissaqarnerummat najukkamilu inuussutissarsiortut sullissinissamut periarfissaqarnerummata.

Paasisat tunniunneqarput

Takornarialerisulli isumaqatigiippugut aaqqitassatut pingaarnersiugassat pillugit. Pingaartumik uku pineqarput:

• Akitsuusersueriaatsip maanna atuuttup nalilersoqqinneqarnissaa allanngortinneqarnissaalu.
• Umiarsualiviit allilerneqarnissaat aserfallatsaalineqarnissaallu.
• Umiarsualiviit allilerneqarnissaasa saniatigut takornariat iluaqutissaannik, ass. perusuersartarfinnik, allagartalersuutinik, aqqusinernik, utaqqisarfinnik assigisaannillu aaqqissuussinissaq.
• Akitsuutinik nutaanik, ass. avatangiisinik sunniinermut akitsuummik, atuutilersitsineq.
• Takornarialerinermik suliaqartut ilinniarsimasunik amerlanerusunik sulisoqalersinneqarnissaannik pingaartitsineruneq.

Takornarialerinermi siunnersuisoqatigiit misissuisitsisoqarneranit nutaanik paasisaqartut, takornarialerinerullu iluani periusissiamik suliaqarnermi paasisat atorneqarumaartut, soorluttaaq paasisat oqartussanut ingerlateqqinneqartut, Anne Nivíka Grødem ilisimatitsivoq.

Umiarsuit sinersorlutik takornariartaatit pillugit misissuititsinermit nalunaarusiaq UANI atuarsinnaavat.