takornariaqarneq
Takornariaqartitsivinnik apersuinermi siuariaateqaqqissimanermik takussutissiivoq
Nunatsinni takornariaqartitsiviit apersornerini ukiup siulianut sanilliullu siuariartoqaqqissimasoq erserpoq.
- Akissutigineqartut pissarsiarisimasagut nuannaarutigissallugit peqqutissaqarpoq, Visit Greenlandimi siunnersorti, Mads-Daniel Skifte, Nunatsinni takornariaqartitsivinnik apersuinermik ingerlataqarsimasoq oqarpoq.
Aasaanerani nunap immikkoortoqarfii tamangajammik siuariaateqarsimallutik nalunaarput.
- Nuummi annertuumik siuariaateqangaatsiarsimasoq nalunaarutigineqarpoq. Ukioq manna islandimiut angalatitsiviutaat Nuummut angallassinertallit tallimaapput, taakkunanilu sisamat nutaajupput. Tamanna sunniuteqarpoq, Mads-Daniel Skifte
Sermitsiaq.AG-mut oqaluttuarpoq.
Ilulissani juunip qaammataani akunnittarfinni unnuinerit ukiup siulianut sanilliullugu 5-6 procentinik qaffariaateqarsimasoq nalunaarutigineqarpoq, Kujataanilu takornarissat amerleriarsimallutik.
Aammattaaq Sisimiuni illoqarfimmi kiinnanik takornartanik misigisaqarnerpaaffiit ilagaat. Tassani Sisimiuniit Kangerlussuarmut aqqut pisuttuartarfik nunami allamiunit soqutigineqangaatsiarluni.
- Piffinni taakkunani pisuttuartartut ukiup siulianut sanilliullugu 20 procentinik qaffariaateqarsimapput. Aliikkutaralugulu aalisarneq takornarianit aamma soqutigineqarluartuuvoq, tassani 30 prcentinik siuaariaateqartoqarsimasoq nalunaarutigineqarluni, Mads-Daniel Skifte paasissutissiivoq.
Tunumi ukiuni arlalinni siuariartuinnartoqarsimanerisa kingorna takornarissat ikileriaateqarsimapput, tassani Air Iccelandip ilaasukinnerusinnaanera pissutaasinnaalluni.