Takornariaqarnerulertoq: Umiarsuarmik takornariarlutik Destination Arctic Circlemut tikittartut amerlanerulertut

Destination Arctic Circle umiarsuarnit takornariartaatinit 94-init tikinneqassaaq. Nunarsuarmit tamarmit takornariartut katillugit 28.498-it tikissapput. Siornamut sanilliullugu umiarsuarlutik takornariartut ukioq manna 4.500-nik amerleriassapput.

Destination Arctic Circlemiipput Sisimiut aamma Maniitsoq, taakkulu nunaqarfii katillugit arfinillit.

Nunap immikkoortua nittarsaanniarlugu Destination Arctic Circle Seatrade Cruise Global-imut Miami-mi pisumut peqataavoq.

- Umiarsuit takornariartaatit tikittalernissaanut suliniutit kinguneqarluarput, nunap immikkoortuani takornariaqarnermik siuarsaasoq Jesper Schrøder tusagassiutinut nalunaaruteqarluni allappoq.

Sarfannguit tikeraarneqartoq

Qeqqata Kommunia nunap ilarujussua, tassa Aasivissuit aamma Nipisat UNESCO-p nunarsuarmioqatigiinnut kingornussassatut allattorsimaffianut ilanngunneqarsimavoq. Nunaqarfik Sarfannguit sumiiffimmiippoq, umiarsuarmit takornariartaammit Ocean Atlanticimit marlunngornermi aggustip 27-ani tikinneqartussanngorpoq. Nunaqarfik siorna tikinneqanngitsuuissimagaluarpoq.

- Nunaqarfimmi takornarianut susassaqartitsinissamut Destination Arctic Circle suleqataavoq, nunaqarfimmiullu neqerooruteqarneranni sullissinerannilu suleqatigalugit. Taamaasilluni nunaqavissut
takornariallu misigisaat pitsaanerpaatinniarlugu qulakkeerinneqataavugut, tusagassiutinut nalunaarummi allassimavoq.

Takornariartaatit anginerit tikittalersut

Maniitsoq umiarsuarnik takornariartaatinik siornatuulli amerlatigisunik tikinneqassaaq. Umiarsuilli tikittussat maanna anginerupput, taamaasilluni Maniitsoq siornamut sanilliullugu takornarianik 1.000-inik amerlanerusunik tikinneqassalluni.

Destination Arctic Circle krydstogtskomitémik suliniuteqarsimavoq, tamannalu takornarianut soqutiginnilersitsisimalluni.

- Nuannaarutigeqaarput piffimmi ataasiinnarmi ineriartortoqanngimmat, kisianni tikinneqartartuni
tamani ineriartortoqarmat. Takornarialerisut suleqatigalugit nutaanik misigisassanik umiarsuarmik takornarianut suliniuteqarpugut. Uatsinnut pingaaruteqarpoq tikittartut aallarniutitut minnerusunut
tikittassasut, atuilluartuuneq aamma piffimmut ataatsimut artukkiinnginnissaq anguniarlugu, piffiimmi tamarmik immikkuullaarissunik tunniussassaqarmata, nunap immikkortuani
takornariaqarnermik siuarsaasoq Jesper Schrøder oqarpoq.

Ineriartorneruneq

Destination Arctic Circle Kangerlussuarmi Maniitsumilu takornarianut sammisunik iliuusissanik pissuserissaarnermik ataqqinninnermillu imaqartunik suliaqassalluni pilersaaruteqarpoq. UNESCO-llu nunarsuarmioqatigiinnut kingornussassarititaanut Nipisanut suliaq aallartereersimallugu.

Umiarsuarnik takornariartaatinik takornariartitsineq ineriartorteqqinniarlugu suliniutigaagut:

• Maniitsumi Krydstogtkomité ineriartorteqqinneqarnissaa, taavalu illoqarfinni nunaqarfinnilu pisariaqartinneqartuni pilersitsisoqarnissaa.
• Pisiniarfiit, katersungaasiviit assigisaallu ammasarfiit iluarsaanneqarnissaat.
• Nunaqarfiit aalajangersimasut talittarfii misissorneqassapput, taavalu iluarsartuunneqarnissaat Namminersorlutik Oqartussat suleqatigalugit aningaasaliiffigineqarnissaat misissorneqassalluni.
• Nunaqarfinni talittarfiit siunissami siunertanut arlalinnut atuussinnaasutut pilersaaruteqarfigineqarmata.
• Umiarsuarmik takornariartaatit aqqutigalugu periarfissat assigiinngitsut sannaviit ilisaritinneqarnissaanut suliniutigissavarput, tamannalu sumiiffinni pisariaqartinneqartuni suliniutigineqassaaq.
• Sisimiut, Maniitsoq Kangerlussuarmilu Arctic Circle Business-ip suleqataaffigissavaa nunap assiginik peqarnissaa, taamaasillutik takornariat tikeraarnerminni sumiiffinni sumiissusersiorsinnaaniassammata.