takornariaqarneq
Takornariaqarnermut suliniuteqarneq aatsaat taama annertutigaaq
Takornariartitsisartut saqqummersitsinerannut Vestnorden Travel Martimut atatillugu nunanit allanit takornariartitsisartut 50-t toqqakkat, aamma nunanit tamalaanit tusagassiortut pingasut, immikkut ittumik misigisaqassapput, takornarissat amerlanerusut Nunatsinnut tikittalernissaannik tamanna siunertaqarpoq.
Takornariartitsisartut saqqummersitsinerat annertooq, Vestnorden Travel Mart, septembarip 18-annit 20-annut Nuummi ingerlanneqassaaq. Pisisartut 117-it nunarsuarmit tamaneersut peqataanissamut nalunaarput, saqqummersitsinerlu sioqqullugu Visit Greenland angallassinernik immikkut ittunik, Nunatsinni angalaffissanut assigiinngitsunut tallimanut aaqqissuussinernik ingerlataqarpoq.
Angallassineq unammillernartoq
Tikeraartut qulit Avannaanut, Kujataanut, Tunumut, Qaasuitsup killeqarfianut aamma Air Greenlandip ''Arctic Highligts''-imik angalatitsineranut agguarneqassapput.
Aaqqissuisut taakku angalatitsinerit Vestnorden Travel Martimi misilinneqartut pisariunerpaat ilaattut nalilerpaat.
Aaqqissuineq sioqqullugu sumiiffinniittut suleqatigalugit programimik pilersaarusiorluni ulapittoqarpoq, taakku nunanit tamalaaneersut pisisartut illoqarfinni nunaqarfinnilu takornariartitsisartut ornitassani tallimaasuniittut naapissavaat. Isumaqagiissuteqarniarnerpassuit inissinniarneqarlutik.
Nammineq misigisaqarnissaat
- Angalatitsinerit taakku tallimat, Kalaallit Nunaata takornarissat sumiiffinni ataasiakkaani angalatitsinernik pisisartut nammineq misigisaqartissavaat. Pisisartut taakku nunatsinnik paasinninnissaat aamma neqeroorutigisinnaasagut immikkuullarissut nammineq misiginissaat pingaaruteqarpoq. Orninneqarsinnaasut assigiinngitsut angalatitsinernik pisisartut pisisartuinut tunineqarnissaanut periarfissat annertunerulersissavaat, Visit Greenlandip pisortarigallagaa, Lykke Yakaboylu, Sermitsiaq.AG-mut oqarpoq.
Air Greenlandip aningaasaliisuuneratigut angalanissat taakkut tallimat neqeroorutiginissaat pisinnaasimavoq, Tunumut angalaneq ilanngunnagu, taanna Air Islandip aningaasaliisuuffigaa.