Takornariaqarneq: Air Greenland Vist Greenlandilu qanimut suleqatigiittut
Sapaatip-akunnerata siuliani nunatsinni timmisartuutileqatigiiffiup aammanunatsinni takornariaqarnermut siunnersuisoqatigiiffiup sinaakkutissatutisumaqatigiissut aamma suleqatigiinnissamut isumaqatigiissutit marlukatsiorpaat.
Suleqatigiinnit sinaakkutissatut isumaqatigiissut, nunatsinni takornariaqarnermik annertusititsiniarluni suliassanik ataatsimoorussanik pilersitsinissamik, kiisalu nunatsinni takornariaqarnermik inuussutissarsiuteqartunut attaveqaatinut tapersersuinissamik suliatigullu ineriartortitsinissamik siunertaqarfiusoq sisamassaanneerluni sivitsorneqarpoq.
Isumaqatigiissut sapaatip-akunnerata siuliani atsiorneqartoq, tusagassiorfitsigut nalunaarummi allassimavoq.
Takornarianut tunisassiatut qinigassat amerlanerusut
Suleqatigiit isumaqatigiissusiornermikkut, najukkani nunap immikkoortui akimorlugit takornariartitsisartut aammalu nunani allani sullissisunut niuernikkut suleqatigiiffissanik pilersitsisoqarnissaanut tapersersuerusupput.
- Nunatsinni takornariaqarnermut tapersersueqataanissaq, tamatumalu peqatigisaanik
niuerfinni ataatsimut aallutatsinni takornariarusuttunut pilerisaarinissaq Air Greenlandip suliffeqarfissuani pingaarnertut suliassaraarput, tamatumanilu piviusunngortitsisarneq Visit Greenland suleqatigalugu ingerlatiinnarsinnaalerparput, Air Greenlandimi CEO Jacob Nitter Sørensen oqarpoq.
Visit Greenlandimi pisortaanerup Anne Nivíka Grødemip oqaatigaa, niuerfiit nalunaarsuiffiginerisigut ilisimasat annertusarneqassasut, ilisimasallu taakku akunnitsinniinnaq avitseqatigiiffigineqartassanngitsut, kisiannili aamma sullissisut ilaatinneqassasut.
- Takornarianut tunisassiat qinigassat amerlanerusut pigissavagut, aammalu sullissisunut tapersersuinikkut piffissaq takornariartitsiffiusoq sivitsussavarput, aammalu naggataagut minnerunngitsumillu nunatta pilerisaarutigineqarnera nukittorsassavarput, taanna oqarpoq.
Siunnerfeqartumik pilerisaarinissaq
Isumaqatigiissutinit ataaseq Kalaallit Nunaata Nunani tamalaani aammalu nunat allat tusagassiorfiisigut pilerisaarutigineqarnissaanut tunngasuuvoq. Kalaallit Nunaata soqutigineqarnera annertusiartorpoq, tamannalu tusagassiortorpassuarnit, Kalaallit Nunaat pillugu allaaserisaqarusuttunit filmiliorusuttunilluunniit malugisimaneqarpoq.
- Air Greenlandimut tunngatillugu tusagassiortuniit saaffiginnissutit amerliartortut misigisarparput. Apersuinissamik kissaateqarnermiit timmisartumi filmiliornissamut akuerineqarnissamut, imaluunniit bilitsinik ujarlernermut. Tamanna ajunngilluinnarpoq. Visit Greenland qaninnerusumik suleqatigalugu nunatsinnik nittarsaassinermi siunnerfeqarnerusinnaavugut, Jacob Nitter Sørensen oqarpoq.
Pingaartumik Amerikap avannaani niuerfiit, Kalaallit Nunaata annertunerusumik
nittarsaanneqarfissat ilaattut tikkuarneqarpoq. Niuerfiit allat pineqartut tassaapput Nunat Avannarliit, Tuluit Nunaat, Tyskland aamma nunat Benelux-imiittut.
- Amerikami avannarlermi niuerfiit ineriartornissamut periarfissaqarfiupput, mittarfiillu nutaat atulerpata Kalaallit Nunaat tikikkuminarnerulertussaavoq. Taamaattumik maannangaaq angalatitsisartunut qitiusunut attaveqarnissap sulissutiginissaa, aammalu ornigassani ineriartortitsinermut tapertaanissaq pingaaruteqarpoq, Visit Greenlandimi pisortaaneq takornariaqarnermut siunnersuisoqatigiinni pisortaaneq Anne Nivika Grødem oqarpoq.
Ilisimatitsissutigineqarpoq, ’Greenland Tourism Award’-ip nunatsinni takornariartitsiartunut, pingaartumik tunisassianik piujuartitsiviusumik ineriartortitsinermikkut malunniuteqartunut tunniunneqartaleqqinnissaa isumaqatigiissummut ilaasoq.