Takornariaqarneq annaaneqartoq 450 mio. kr.-nik akeqassasoq

Coronap ajornartorsiortitsinera pissutigalugu takornariaqarneq annaaneqarpat tamanna inuiaqatigiinnut 450 millioner koruuninik akeqassasoq, nalilersuinermit Grønlandsbankenimit suliaritinneqarsimasumit, takutinneqarpoq

Coronavirusip takornariaqarneq tamaat eqqussappagu, nunamullu takornarianik tikittoqarani, nunallu iluani angalasoqaqqusaanani, tamanna nunap ataatsimut tunisaasa nalinginut qanoq sunniuteqassanersoq Grønlandsbankenip Copenhagen Economics peqatigalugu misissorsimavaa.

Sermitsiaq taama allappoq.

Naliliipput takornariaqarnermik inuussutissarsiorneq 80 procentit angullugit appariassasoq, ajornerpaassappallu tamanna inuiaqatigiinnut 450 millioner koruuninik akeqassaaq. Tamanna takuneqarsinnaavoq coronap atugaanera qaammatit tallimat missaat angullugit atuutissappat nunap ataatsimut tunisaasa nalinginut sunniuteqarnissaanik naatsorsuinikkut, ilimagisat saniatigullu sunniuteqaataasut ilanngullugit.

Ajornerpaamik pisoqassappat

– Grønlandsbankenip nalilersinnaanngilaa ajornartorsiorneq qaammatit tallimat atorlugit qaangerneqarsinnaanersoq, tamannali aallaavigisimavarput takornariaqarneq tamaat annaaneqassappat nunap ataatsimut tunisaasa nalinginut sunniuteqaatissat ajornerpaat naatsorsorniarneranni. Takorluuinerup tamassuma takutippaa (pisarnertut nalornissutaasartut atorlugit) nunap ataatsimut tunisaasa nalingat taaneqartutut appariassasut, amigartooruteqalernavianngitsorli, aalisarneq sanaartornerlu ingerlalluarpasimmata, Grønlandsbankenip pisortaa Martin Kviesgaard nassuiaavoq.

– Ersersinniagarput tassaavoq takornariaqarnerup aningaasarsiornermi killeqartuunera pissutigalugu taava tamassuma nunap ataatsimut tunisaasa nalinginut sunniutaa annertussaaq, tamakkiisumilli aserorsaataanani. Qularnanngilluinnarpoq sammisaqarfiit allat aamma sunniuteqarnerlussasut, taamaattumik manna tamakkiisumik takutitsinngilaq.

Sermitsiami takornariaqarneq pillugu naliliineq tamaat atuaruk - ugguuna pissarsiarisinnaavat:

Powered by Labrador CMS