Takornariaqarani aasarsiortoqaqqissasoq
Takornarianut akiuussutissamik kapitereersimasunut maanga angalasinnaanermut killilersuinerit naak sakkukillisinneqaraluartut, maanga takornariat ukioq manna amerleriarnissaat naatsorsuutigineqarpallaanngilaq.
2021-p aasaanera annerusumik takornariaqarnavianngilaq. Takornarialerisut arlallit taama naliliipput, taakkumi ilimanartoqartinngilaat akiuussutissamik kapitissimasunut mattusimanissamik malittarisassat nutaat annerusumik sunniuteqassangatinnginnamikkik.
Aviisi Sermitsiaq taama allappoq.
Tassami takornariat ullup aappassaanni misissorteqqinnissamik tungaanut mattusimaqqaartartussaammata, tamatumalu kingorna akissutisinissartik, nalunaaquttap akunnerini 72-iusinnaasuni utaqqisassallugu. Taamaalilluni piviusumi takornariat ulluni 3-5-ini mattusimatinneqarsinnaasassallutik. Soorunami siusinnerusumut sanilliullugu pitsanngoriaateqalaarpoq. Takornarialli amerlanngitsuinnaat feeriarnermik nalaani ulluni arlalinni mattusimanissartik akuerisinnaassavaat.
- Takornarianut kapitereersimasunut sakkukillisitsisoqarnera nuannaarutigaara. Sivikinnerpaamilli suli ulluni pingasuni mattusimasoqartassalluni. Sivisunerusumilli mattusimasoqarsinnaassalluni, soorlu tallimanngornikkut tikikkaanni, illoqarfinnimi tamani sapaatikkut misissuisoqarneq ajormat. Taava aamma ilaanneeriarluni akissutisinissaq sivisuumik utaqqineqarsinnaasarluni. Taamaalilluni takornariatut tikiffigissallugu pitsaanerpaanani, Innovation South Greenlandimi takornarialerinermi pisortaq Sarah Woodall oqarpoq.
Aviisimi Sermitsiami atuarnerusinnaavutit: