Takornarianut nassuiaassisut Sarfaq Ittuk suleqatigaat

Arctic Umiaq Line ukiup aappassaa takornarianik nassuiaassisartunik sulisoqarpoq. Aasaanerani angallannermi takornarianut umiarsuarmi ikiortitut sulipput.

Pipaluk Lynge aamma Mathias Stenbakken Sarfaq Ittummi ukioq manna sulisorineqarput.

Sulisunut ikiortit
Pipaluk Lynge Ilimmarfimmi ilinniagaqartuuvoq, Mathias Stenbakken Qaqortumi ilinniagaqartuulluni.

Takornarissanut nassuiaassisutut aasaanerani sulisuupput, Umiaq Linemi pisortaq, Jette Larsen Sermitsiaq.AG-mut oqarpoq.

- Takornariat ataatsimut angalaqatigiittarunnaarnikuupput, taamaattumik takornarialerisunik sulisoqarnissarput pisariaqartissimavarput.

Takornarianut apeqqutinik ilaatigut Pipaluk Lynge aamma Mathias Stenbakken tunniussisarput.

Takornariat iluarisimaarpaat
- Kingullermik takornarianut isumasiuititsisoqarmat 2013-mi takornarissat sullinneqarnertik iluarisimaarpaat. Takornariat nerisatik kisimi isornartoqartissimavaat, tamannalu pitsaanerulersinniarlugu ukioq manna suliaqarpugut, Jette Larsen oqarpoq.

Sarfaq Ittummi ilaasut 4.400-t 2013-mi apersorneqarput.

Takornariaqarneq qanoq pitsaanerulersinnaanersoq Mathias Stenbakken isumaliutersorpoq.

Qaqortumi takornarialerinermut 2012-mi ilinniagaqarpoq, kiisalu Islandimi takornarialeriffimmi suliffimmik misiliisimalluni.

Islandip suleqatigineqarnissaa
- Islandimik suleqateqarneq annertusarneqartariaqarpoq, tamanna Kalaallit Nunaata takornariaqarneranut iluaqutaassaaq, Mathias Stenbakken oqarpoq.

- Aamma internetti pitsaanerusumik atortariaqarparput. Periarfissaasut tamarmik internettikkut takuneqarsinnaalertariaqarput.

Mathias Stenbakken aqqaneq marlunnilli ukioqarluni takornarialerinermik suliaqalerpoq, misilittagaqarlualersimallunilu. Ilaatigut eqqaamavaa amerikarmiumit 800 koruuninnassimanini.