Takornarianik pisuunik aalisartitsinissaq iluatsinngitsoortoq

Illoqarfiit pingaarnersaata kommuniani aningaasaqarnermut ataatsimiititaliap ukioq kaajallallugu illuaraqartoqarnissaa akuerinngimmagu, takornarialerinissamut suliniut annertooq, nunanit allamiunik pisuunik aliikkutaralugu aalisartitsisarnissamik suliniuteqartoq, piviusunngunngitsoortussanngorpoq.

Illoqarfiit pingaarnersaata kommunia takornarianut neqerooruterpassuaqarusuppoq, suliniulli Nuup kangerluani takornariat pisuut aliikkutaralugu timersuutigalugulu aalisariartarnissaannut tunngasoq politikerinit unitsinneqaqqammerpoq.

Paatsuungasoq

- Aalajangerneq taanna paasisinnaanngilluinnarpara, Svend Hardenberg suliniuteqartoq, Nuup kangerluata avannaatungaani Qussummi/Narsarsuarmi 5 kvadratkilomiiterisut annertutigisumik nunaminertamik qinnuteqartuusoq oqarpoq.

- Illuaraliorsinnaanngikkutta suliniut tamarmi piviusunngunngitsuussooq. Ajoqaaq, kommunillu aalajangernini pillugu uannut nalunaaruteqarsimannginnera pakatsissutigaara, akissutissarsiumallungami arlaleriarlunga saaffigisareerpakka, Svend Hardenberg aalajangerneq pillugu Sermitsiaq.AG-miit ilisimatinneqarami oqarpoq.

Taassuma eqqumiigilluinnarpaa takornariat aningaasaateqarnerusut neqerooruteqarfiginissaanut suliniut itigartinneqarmat.

- Illuaqqat suliniummi pingaaruteqarput, aliikkutaralugumi aalisartut immikkut illuinnartumik misigisaqartinneqartariaqarput. Itigartitsinermi suliffissaagaluit pinngitsoortussanngorput, suliniummimi anguniarneqaraluarpoq nerisassanik pitsaalluinnartunik sassaallertarnissaq, aaqqissuussaasunik takornariartitsisarnissat, pisuunullu takornariartitsinermi suliffissat allat suliniummut attuumassuteqarsinnaasut, Svend Hardenberg oqaluttuarpoq.

Ingerlanneqangaatsiarsimasoq

Suliniut kommunip iluani angallanneqangaatsiarsimavoq, suliniutillu aningaasaqarnermut ataatsimiititaliami qaqinneqarnissaa piffissami sivitsortumi kinguartinneqartarsimalluni.

Aningaasaqarnermut ataatsimiititaliap eqikkagaani ima oqaasertaqarpoq:

- Aningaasaqarnermut Inuussutissarsiornermullu Ataatsimiititaliap suliaq Sanarfinermut Avatangiisinullu Ataatsimiititaliamut nassiuteqqippaa. Tassunga pissutaavoq Kommunemi pilersaarusiornermi, 09 sumiiffik qinnuteqarfigineqartoq Qussummi, illuaqqanik sanaartornissaq periarfissaassanngimmat, siunnersuullu FN-ip nunarsuaq tamakkerlugu piujuaannartitsinissamut anguniagai 17-iusunut atatillugu misissoqqissaarneqaqqaassammat.

- Suliniutitsinni pingaaruteqarluinnarpoq piujuaannartitsinissaq, aamma illuaqqat eqqarsaatigalugit, taamaammat paasisinnaanngilara sooq maannakkut FN-ip nunarsuaq tamakkerlugu piujuaannartitsinissamut anguniagai ilanngunneqarnersut, Svend Hardenberg oqarpoq.

Annertussusaa killilerneqartoq

Aningaasaqarnermut ataatsimiititaliamut innersuussummi isumaqaraluarpoq illuaqqat sisamat annerpaamik 60 kvadratmiiterisut annertussusillit sananeqarsinnaassasut.

- Illuatungaani kommunep takornariaqarnermut iliuusissaq akuersissutigaa, takornariat amerlanerusut tikisittalernissaat anguniarlugit, suliffissallu amerlisinniarlugit, uungali tunngatillugu aalajangernerup takutippaa takornariat akiliisinnaanerusut kissaatigineqanngitsut, Svend Hardenberg tupigusulluni oqarpoq.

Sanarfinermut Avatangiisinullu Ingerlatsivik maanna suliassaqalerpoq Kommunep pilersaarusiorneqarnera iluarsartuutissallugu, sumiiffimmi akuersissuteqarnissamik qinnuteqarfiusumi ukioq kaajallallugu illuaraqartoqarsinnaannginnera ilanngunneqarniassammat.

Qinnuteqartut marluk

Sumiiffimmi alla akuersissummik aamma qinnuteqarpoq, suliniummili tassani illuaqqanik sanaartornissaq pisariaqassanngilaq.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS