turisme
Takornarianik paasiniaapput
Takornariaqarnermut siunnersuisoqatigiit Visit Greenlandip aamma Kalaallit Nunaanni Naatsorsueqqissaartarfiup takornariat amerlassusaat suminngaanneertarnerilu paasiniarpaat
Takornariat qanoq amerlatigisut Nunatsinnut tikittarpat?
Nunanit suminngaanneersuuppat?
Qanoq sivisutigisumik Nunatsinniittarpat?
Sammisassallu suut soqutigisaraat?
Apeqqutit ajornanngippasissut, imaasiallaannarli akissutissaqanngitsut.
Kalaallit Nunaanni Naatsorsueqqissaartarfiup umiarsuarnut takornariartaatinut, timmisartorlutik tikittunut akunnittarfinnilu unnuinernut kisitsisitigut takussutissat ullumi tamanut saqqummiutissavai, apeqqutit ilaannut akissutissiisinnaasut. Titartakkalli kisitsisillu tamatigut imaasiallaannaq paasiuminartuuneq ajorput. Tamatumalu saniatigut paasissutissanut tunngaviit pioreersut aamma amigaateqarput. Assersuutigalugu ullumikkut ilisimanngilarput takornariat qanoq amerlatigisut timmisartumik tikittarnersut tikeraalllu nunanit suminngaanneernersut.
Taamaattumik ineriartorneq iluamik takussutissarsiniarlugu Visit Greenlandip qupperneq nittartagaq http://www.touristmstat.gl pilersippaa, taannalu arfininngormat Nuummi angalanernik takutitsinermi Vestnorden Travel Mart-imi ilisaritinneqarpoq.
Aallaqqaammut aallaaviupput Kalaallit Nunaanni Naatsorsueqqissaartarfimmi kisitsitigut paasissutissat pigineqareersut - tamatumalu kingorna pilersaarutaavoq paasissutissat ineriartortinnissaat.
Quppernermik nittartakkamik siunertaavoq takornariaqarnermut paasissutissat pissarsiarineqarsinnaasut tamaasa ataatsimut katersornissaat, taamaasillunilu inuussutissarsiorfik politikerillu takunnissinnaalersillugit Kalaallit Nunaanni takornariaqarnerup ineriartorneranik. Assersuutigalugu nunap immikkoortuini ataasiakkaani ineriartorneq, takornariat suut tikittarnersut, tunuliaqutaat Nunatsinnukarnissaminnullu tunngavigisaat kiisalu takornariaqarnikkut aningaasatigut sunniuteqaatit.
Immikkoortut marluk
Qupperneq nittartagaq marlunnik immikkoortoqarpoq. Ilaatigut Kalaallit Nunaanni Naatsorsueqqissaartarfimmit paasissutissanik, ilaatigullu 450-inik apersuinernit paasissutissanik.
Visit Greenlandip takornariarpassuarnit, 2012-imi aasakkut 2013-imilu upernaakkut sumunngarfinnut assigiinngitsunut arlalinnut tikeraarsimasunit, naliliinerit katersorsimavai.
Tamatuma klngorna takornariat akissutaat tunngavigalugit takornariaqarnermut siunnersuisoqatigiit takornariat agguarsimavai soqutigisaat sammiumasaallu naapertorlugit.
Kisitsisitigut takussutissat akissutissanik tamanik ingerlaannaq takutitsinngillat, ersarissumilli takutippaat paasissutissat suut ullumikkut pigineqarnersut, paasissutissallu suut suli amigaatiginerigivut takornariaqarnermut kisitsitigut takussutissanik tamakkiisunik peqalernissatsinnut.
Visit Greenlandip 2012-imi 2013-imilu suliassaasa pingaanerit ilagisimavaat takornariaqarnermik inuussutissarsiornermut kisitsisitigut uppernarsaatitigullu pitsaanerusunik takussutissiornissaq 2012-imiillu 2015-imut nuna tamakkerlugu takornariaqarnermut periusiornissaq.