Takornarialersut qullersaqarfia Narsarsuarmit nuunneqassaaq: Uggornarpoq pisariaqarlunili

Narsarsuup mittarfia qulimiguulinnut mittarfinngortinneqarpat, Blue Ice Explorer allannguutinut nalimmassassaqqaarpoq, tamannali misigissutsinik qaffakaatitsivoq, pisortaanerup oqaluttuaraa.

Coronap nalaani takornarialerineq ilungersunarsimavoq, 2022-li ajunngilluinnarsimasoq, pisortaaneq Topas Explorer Groupimeersoq, Jørgen Sølvsten Nielsen oqaluttuarpoq.

Qaqortup mittarfittaassaa 2025-mi atorneqalerpat Narsarsuarmi mittarfik qulimiguulinnut mittarfittut atorneqalissaaq – tamanna Narsarsuup siunissaata qanoq isikkoqarumaarneranik ukiualunni eqqartuinissamik periarfissiisimavoq. Ullumikkut Narsarsuarmi mittarfik Københavnimut aamma Nuummut timmisartuussinermi kiisalu Kujataani illoqarfinnut qulimiguulinnik attaveqarnermi qitiusutut inissisimavoq. Tamatuma saniatigut Kujataani takornarialerinermi aamma qitiusutut inissisimavoq.

Aviisi Sermitsiaq taama allappoq.

Taamaammat Narsarsuarmi takornarialerinerup iluani periarfissanik eqqartuinissaq pingaaruteqarpoq, Jørgen Sølvsten Nielsenip, takornariartitsivimmik najukkami aallaavilimmik Blue Ice Explorerimik Narsarsuarmi ingerlatsisumit Topas Explorer Group Aps-imeersup, allannguinerup malitsigisaanik suliffeqarfiup ingerlatai tamarmik allanngortiteriffigineqassasut aammalu takornariartitsiviup Narsarsuarmiit Qaqortumut nuunneqarnissaa nalilerpaa.

- Narsarsuarmi inuussutissarsiutit amerlanerpaat matuneqaraluarpataluunniit Kujataa tamakkerlugu ingerlataqarpugut, Igalikuli soqutigineqarnerpaavoq. Kisianni suliffeqarfitta qullersaqarfia immikkoortortaqarfiillu ilaat Narsarsuarmiit Qaqortumut nuuttariaqalissavavut, pisortaaneq oqaluttuarpoq.

Blue Ice Explorer 1996-imi franskimit Jacky Simoudimit pilersinneqarpoq. Jacky Simoud Topasilu Danmarkimeersoq 2002-mi qanimut suleqatigiilerput kingornalu Blue Ice Explorer suliffeqarfeeqqatut ingerlajunnaarluni aasaanerani arlalinnik sulisoqartalersimalluni. Blue Ice 2017-miit Topas Groupimit tamakkiisumik pigineqalerpoq.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS