Takornarialerisutut nutaaliortoq nersornaaserneqartoq

Grønlandsbankenip Inuussutissarsiornermut Aningaasaateqarfia aallarniisunut pingasunngormat nersornaasiivoq.

Anders Lykke Laursen Nuuk Water Taximeersoq aamma Jesper Øraker Greenland Escapemeersoq Grønlandsbankernip Inuussutissarsiornermut Aningaasaateqarfianit nersornaaserneqarput.

Grønlandsbanken tusagassiorfinnut nalunaaruteqarluni allappoq.

Nutaaliortut

- Inuussutissarsiornermut Aningaasaateqarfiup Aallarniisunut nersornaataanik 2020-mi tigusisussatut Anders Lykke Laursen aamma Jesper Øraker toqqarneqarneranut tunngavilersuutaavoq takornariartitsinermi nutaaliornerat, aningaasaateqarfimmi siulittaasoq Kristian Lennert oqarpoq.

Anders Lykke Laursen Inuussutissarsiornermut aningaasaateqarfimmiit 2020-imi aallarniisut nersornaasiissutaanik tunineqarpoq aallarniisutut Greenland Water Taximi misigisassanik assigiinngitsunik pilersitsisimagami.

Jesper Øraker Inuussutissarsiornermut aningaasaateqarfimmiit 2020-imi aallarniisut nersornaasiissutaanik tunineqarpoq aallarniisutut takorniariartunut nioqqutissamik nutaamik misigisaqarluartitsigami, taavalu immikkut takornariartunut tulluarsakkanik iluarsiissutinik Greenland Escapemiit neqerooruteqartarami.

Nersorneqartariaqartut

- Jesper aamma Anders takornarianut neqeroorutinik nutaanik pilersitsisimapput, takornarialerisut akornanni suleqatigiinnerulertoqarpoq tamanut iluaqutaasumik, takornarianut neqeroorutit takornarialerisullu piginnaasaat takornariartunut ataatsimoortumik misigisaqartitsinissamut atorluaapput. GrønlandsBANKEN-illu Inuussutissarsiornermut Aningaasaqarfianit isumaqarpugut suliamut tunniussimaneq sumiiffimmi takornarialerinermut ineritortitsisuusoq, allanillu isumassarsisoq nersorneqartussaq, Kristian Lennert toqqaanermut atatillugu tunngavilersuivoq.

Nersornaammik tunniussinermut ilaapput aningaasat 25.000 koruunit, nersornaaserneqartut avitassaat.

Powered by Labrador CMS