Skip to main content

Takornarialerisut ikiorsiissutit pillugit: Saammarsaatit

Takornariarnermik inuussutissarsiortut ajornartorsiortorujussuupput Naalakkersuisullu ikiorsiivallaarsinnaangitsut misigaat. Takornarialerisunut ikiorsiissutiliaq kingulleq sunniuteqangaarnavianngitsoq, Qaqortumi takornariartitsinermik ingerlatsisoq naliliivoq.

Qaammatini qaangiuttuni suliffeqarfiit ikiorsiissutinit marlunnit namminersorlutik inuussutissarsiortunut sammitinneqartunut ikiorsiivigineqarnissamik qinnuteqarsinnaapput. Ikiorsiissutit taakku aqqutigalugit suliffeqarfinnut covid-19-p siaruaarneranik sunnernerlunneqartunut ikiorsiissutit 34 mio. kr-it missaanniittut agguaanneqarput.

Aviisi Sermitsiaq taama allappoq.

Ikiorsiissutit nangittumik atuutsinneqarput, mannalu ”takornariartitsinermik inuussutissarsiortunut ikiorsiissummik” nutaamik tapertalerneqarlutik. Ikiorsiissummi tassani maani najugallit nunatsinni feeriarneri, unnuinermi takusassarsiorluniluunniit angallanneqarnermi akip ilaanik utertitsivineriatigut akikinnerulersinnissaat ilaatigut siunertarineqarpoq. Taamaalillutik hotelit takornariartitsisulluunniit unnuiffimmi angallassinermiluunniit ”covid-19 rabat”-mik akikilliliisut, akikilliliissutiminnik namminersorlutik oqartussanit utertitsivigineqarsinnaalissapput.

Unnuinerni unnummut ataatsimut 500 kr-t tikillugit utertitsisoqarsinnaavoq, angallassinermilu akiliutip ilaa 300 kr. tikillugu utertinneqarsinnaalissalluni. Taamaalillutillu takornariartut hotelinut angallassisunulluunniit akikilliliivigineqarnissamik apersuisinnaalisssapput, sullissisulli akikilliliissummik atuutsitsinissaq aalajangigassarissavaa.

– Naalakkersuisut iluarisimaarinneqalutik ikiorsiissut suli alla manna tamanut saqqummiussinnaalerpaat – massakkut takornariarnermik inuussutissarsiortunut sammitinneqartoq. Namminersorlutik inuussutissarsiortut suliffeqarnermilu illuatungeriit pitsaasumik siunnerfeqartumillu suleqatigalugit piffissaagallartillugu, aasaaneranilu ulapaarfiup allartilluannginnerani takornariarnermut inuussutissarsiortunut sammititamik ikiorsiissut atuutilersipparput. Peqatigisaanik ikiorsiissutit pioreersut 30. septembarip tungaanut atuunnerat sivitsorpavut. Taakku tamarmik namminersorlutik inuussutissarsiortut covid-19-p atuunnerani ikiorserneqarnissamik suli pisariaqartitsinerannut iliuusaapput, Inuussutissarsiornermut Aatsitassanullu Naalakkersuisoq Jens-Frederik Nielsen oqarpoq.

Akikilliliinerit sunniuteqanngitsut

Angallanneqarnermi 300 kr-nik unnuinermiluunniit 500 kr-nik akikilliliivigineqarneq takornarianut takornariartitsisunulluunniit annertuumik sunniuteqanngitsoq taanna ilanngullugu isumaqarpoq.

– Akikilliliissutinik atuissagutta tikeraat maanngartittariaqarpavut. Mannalu tikillugu taamaatitsiinnartut kisimik tutsiuttarput. Isumalluassaguma aasaq naallugu immaqa qulit inniminniissapput. Tamannalu inuussutigineqarsinnaanngilaq. Akikilliliissut saammarsaataanngilluinnarpoq, takornarianillu maannartitsiniaanissaq uumilanartuutippara, peqatigisaanillu taamaaliornitsinni uagut takornariallu nappaammik tunillanneqarnissaannik aarlerinartorsiussapput. Imminullu qanillinnginnissamik peqqinnissakkut piumasaqaatit qaffasinnerpaat naammassissagutsigit tamanna uatsinnut aamma aningaasartornerunermik soorunami nassataqassaaq. Mattusimanissarmi taava? Nalinginnaasumik takornariat ullut pingasut Qaqortumiittarput, peqqinnissamulli oqartussaasut ulluni tallimani mattusimanissamik kissaateqarput. Qanorluunniillu ilioraluarutta ajornakusoorluinnartumi inissisimavugut, Pitsi Høegh, Greenland Sagami, Qaqortumi takornarialerinermik suliaqartoq oqarpoq.

Aviisimi Sermitsiami atuarnerusinnaavutit. Aviisi uani pissarsiariuk:

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER