Takornarialerisunut ikiorsiissutit nutaat
Naalakkersuisut takornariartitsinermik inuussutissarsiuteqartunut ingerlatassat, marlunnik aaqqissuussinertaqartut aqqutigalugit qulakkeerniarpaat, takornariartitsinermut suliffeqarfiit aasaanerani suliaqarnerpaaffiusartumik, coronap ajornartorsiortitsineranit sunnernerlunneqaratik aniguisinnaanerat.
Takornariartitsinermik inuussutissarsiuteqartut arlallit aasakkut takornariatitsinermik ingerlatsinissartik annertuumik ernummatigaat, takornariarniat Kalaallit Nunaannut tikissinnaannginnertik pissutigalugu inniminnisimasut ikittuinnaasimammata.
Naalakkersuisut tamanna eqqarsaatigalugu, Kalaallit Nunaanni Sulisitsisut, SIK, Nusuka KNAK-lu il. il. oqaloqatigereerlugit, "Takornariartitsinermik inuussutissarsiuteqartunut ingerlatassat” marlunnik nutaanik aaqqissuussinertaqartut, takornariartitsinermik inuussutissarsiuteqartuni ingerlataqalersitsisussat atuutsilerpaat.
Peqatigisaanik ikiorsiissutissat atuutereersut atuuffissaat Naalakkersuisut sivitsorpaat, taamaalillutik taakkua aasaanerani suliaqarfiusussami aammalu 30. september 2020 tikillugu ilanngullugulu, aamma atuutissallutik. ”Takornariartitsinermik inuussutissarsiuteqartunut ingerlatassat” nutaat ikiorsiissutissanut atuutereersunut tapertaassapput.
Takornariartitsinermik inuussutissarsiuteqartunut ingerlatassat nutaat
”Takornariartitsinermik inuussutissarsiuteqartunut ingerlatassani” aaqqissuussinernut nutaanut marlunnut taakkununnga siunertaavoq, nammineq nunagisami sulinngiffeqarnissap nunatsinni najugaqartunut akikinnerulersinnissaa. Naatsorsuutigineqarpoq takornariartitsinermut suliffeqarfiit ingerlataqarnerulersinneqassasut, taamaalillunilu aasaanerani suliaqarfiunerpaasussap, atugassarititaasut immikkut ajornakusoorneranni, anigorniarnissaanut ikiorserneqassasut.
Aaqqissuussinerup atuunnerani akunnittarfiit aamma takornarialerinermik suliaqartut il.il., unnuinernut imaluunniit takornariartitsillutik angallassinerni COVID 19-eqarnerani akikillisaasiisimasut, COVID 19-eqarnerani akikillisaatit Namminersorlutik Oqartussanit utertillugit akilersissinnaassavaat.
COVID 19-eqarnerani unnuinernut akikillisaataasumut 500 koruunit angullugit utertillugit akilerneqartassapput.
COVID 19-eqarnerani takornariartitsilluni angallassinermut akikillisaataasumut 300-nit angullugit utertillugit akilerneqartassapput.
Taamaasilluni unnuisarfinni angallassisunilu COVID 19-eqarnerani akikilliliinernut takornariartup nammineerluni piumasarisinnaagaa periarfissaavoq, kisianni COVID 19-eqarnerani akikilliliiissaq atorneqassanersoq sullissisup nammineerluni aalajangigassaraa.
Takornarissanut sullissisut ullormut angallassinermut kisimi Namminersorlutik Oqartussaniit taarsiiffigineqarsinnaapput. COVID 19-eqarnerani sorliit akikilliliivigineqassanersut sullissisup nammineerluni aalajangissavaa.
Imatut qinnuteqartoqassaaq - paasisaqarnerugit
25. juni 2020 aallarnerfigalugu aaqqissuussinerit nutaat marluk taakkua ataanni tapersiivigineqarnissamut qinnuteqartoqarsinnaalissaaq. COVID-19-p kingunerisaanik ikiorsiissutissat tamarmik ataanni aaqqissuussinerit tamarmik 30. september 2020 tikillugu qinnuteqarfigineqarsinnaapput.
Qinnuteqarnermi immersugassanik il.il. pissarsiniarneq pissaaq inuussutissarsiornermut nittartagaq www.businessingreenland.gl (www.big.gl) aqqutigalugu. Tassaniipput aaqqissuussinerit pillugit paasissutissat annertunerusut kiisalu qinnuteqarfissanut assigiinngitsunut link-it.
Aaqqissuussinernut maleruagassat pillugit annertunerusut atuakkit uani: www.big.gl
Inuussutissarsiornermut Aatsitassanullu Naalakkersuisoq Jens-Frederik Nielsen oqarpoq:
- Naalakkersuisut naammagisimaarlugu maannakkut ikiorsiissutissanik suli allanik saqqummiussisinnaalerput – tamatumuuna takornariartitsinermik inuussutissarsiuteqartunut. Inuussutissarsiortut aamma suliffeqarnermi illuatungeriit pitsaasumik pilersitsiviulluartumillu suleqatigalugit takornariartitsinermik inuussutissarsiuteqartunut siunnerfilimmik ikiorsiinissaq piffissaagallartillugu, aammalu aasaanerani suliaqarfiunerpaasartoq pimoorussamik aallartitsinnagu, atuutsilerparput. Peqatigisaanik ikiorsiissutissat atuutereersut atuuffissaat 30. septembari tikillugu ilanngullugulu sivitsorparput. Taakkua tamarmik inuussutissarsiortunut COVID-19-p kingunerisaanik inissisimanerup anigorniarnissaanut taperserneqarnissamik suli pisariaqartitsisunut iluaqutaassapput.
Sivitsuineq nuannaarutigineqartoq
Pisortaq Brian Buus Pedersen, Sulisitsisut, SIK-mut siulittaasoq Jess G. Berthelsen, aamma Nusuka-mut siulittaasoq Gerth Lynge, KNAPK-mut siulittaasoq Henrik Sandgreen oqarput:
- Coronap ajornartorsiortitsinera naatsorsuutigineqaqqaartunit sivisunerusoq annertunerusorlu paasinarsisimavoq. Inuussutissarsiortunit tusartarparput, pingaartumik takornariartitsinermik inuussutissarsiuteqartut piffissami aggersumi eqqugaanissartik naatsorsuutigigaat. Taamaattumik aaqqissuussinernik nutaanik taakkuninnga, aasaanerani suliaqarfiunerpaasussami takornariartitsinermik inuussutissarsiuteqartunut ikiorsiissutaasinnaasunik, aaqqissuusseqataasinnaagatta nuannaarutigaarput. Aammalu ikiorsiissutissanik atuutereersunik sivitsuisoqarmat, taamaalillutik suliffeqarfiit allat annaasaqarlutik suli ajornartorsiortut, tunngavissaarutissanngimmata nuannaarutigaarput.