Takornarialerisoq: - Pigisagut nalillit tuniniartariaqalerpagut
Julimi akiliisitsilluni piniariartitsisarneq takornariat taamatut nunatsinnut takornariarumasut akornanni nuannarineqarluartuuvoq, maannali covid-19-illu ajornartorsiortitsereeqisup qaavatigut taamatut takornariartitsisarnermi qaammatip julip peerneqarnerata malitsigisaanik aningaasatigut ajornartorsiulernermik malitseqarpoq – ajornartorsiulerneq ima annertutigaaq – akiliisitsillutik takornariartitsisartut ilaasa pigisatik tuniniartariaqalerlugit takornariartitassaagaluaminnut aningaasanik utertitsisinnaassagunik.
North Safari Outfitters, Thomas Olsen-imit pigineqartoq akiliisitsilluni piniariartitsisarnernik 2012-mili ingerlatsilernikuuvoq, maannali piffissaq apeqqutaaginnalerpoq allatut iliorsinnaajunnaarluni suliffeqarfimminik matusisariaqalersinnaanissaanut, julimi akiliisitsilluni takornariartitsisarnerup atorunnaarsinneqarnissaanik Naalakkersuisut tassanngaannaq aalajangernerisa kingunerisaanik:
- Takornariat akiliillutik piniariaatigisartut akornanni qaammat juli nunatsinniiffigissallugu nuannarineqarluartuuvoq taamaammaallu qaammat taanna taamatut ingerlatsisuusugut isertitaqarfigilluartarparput. Taamaakkaluartoq Naalakkersuisut toqqarsimavaat qisuariarnissamut iluamik piffissaqartitsinatik atorunnaarsissallugu, uffa takornariaatitta ilai nunatsinnut ingerlaalereersut ilaalu nunatsinniilereersut naatsorsuutigalugu pilersaarutit malillugit piniariarnissartik ingerlanneqarumaartoq. Tamannali pinngilaq, paarlattuanimmi julip qaammataani tikereersimasut angerlarteqqiinnartariaqalernikuuagut tikittussaagaluillu unitsiinnartariaqalernikuullutigit. Tamanna aamma isumaqarpoq takornariartuutissatta siumoortumik akiliutigeriigaat aamma utertittariaqalernikuugigut ukioq mannamut aappaagumullu tunngatillugu, Thomas Olsen, North Safari Outfitters-imik piginnittoq ingerlatsisorlu, akiliisitsillunilu piniariartitsisarnermik inerisaasimasoq oqaluttuarpoq.
Pigisatik nalillit tuniniartariaqalerpaat
Maannalu allatut iliorsinnaajunnaarluni akiliillutik piniariartorlutik takornariartussaagaluit North Safari Outfitters-ip akiliutigisimasaannik utertitsisariaqalernerup malitsigisaanik aningaasanik ujarlertariaqalernermik nassataqarpoq, tassami aningaasat akiliutigineqareersut piareersarnermut aningaasaliinernullu atorneqareermata:
– Manna tikillugu naatsorsuutigisinnaasimavarput taamatut takornariartitsisarneq allanngorartinneqanngitsumik ingerlanneqarsinnaasoq, taamaalilluta aamma ukiut marluk siumut aaqqissuussereertarnerit pilersaarusiortarnerillu ingerlattarsimallutigit, takornariassamaartullu siumoortumik akileereertarput, taakkulu akiliutaat utertittariaqalerpagut, ilaatigut Thomas Olsen Sermitsiamut taama oqarpoq.
Allaaserisaq tamaat uani Sermitsiami atuaruk: