Takanna: Siulittaasoq 360.000 koruuninik aningaasarsisassasoq
Naalakkersuisut aalajangersimavaat, eqqarsuussissuserisoq Jens Paulsen Aallsarnermut Isumalioqatigiissitami siulittaasutut aningaasarsiaqartassasoq
Septembarip tallimaani ataatsimiittoqarmat Naalakkersuisut aalajangerput, Jens Paulsen qaammammut 30.000 koruuninik aningaasarsiaqartinneqartassasoq. Tassa ukiumut 360.000 koruunit nalingannik.
Aningaasat Namminersorlutik Oqartussat suliffeqarfiutaanni KNI-mi, Air Air Greenlandimi, Royal Arctic Linemi Tele Greenlandimilu siulersuisut siulittaasuisa aningaasarsiarisartagaannit amerlanerulaarput. Taakku 350.000 koruuninik aningaasarsisarput.
Suliassanut nassuiaatit
Aalisarnermut Isumalioqatigiissitap suliassaasa nassuiaataanni innersuussutigineqarpoq, siulittaasup ilaasortallu arlaannaannulluunnit attuumassuteqaratik immikkut ilisimasallit aningaasarsiassaat aningaasarsisitsisarnermut inatsit 2003-mi decembarip qaammataani atuutilersoq naapertorlugu aalajangersarneqartassasut.
Aalisarnermut Naalakkersuisoqarfimmi pisortap, Isak Olsenip Sermitsiaq.AG-mut ilisimatitsissutigaa, arlaannaannulluunniit attuumassuteqaratik ilaasortat immikkut ilisimasallit qanoq aningaasarsiaqartinneqarnissaat suli aalajangerneqarsimanngitsoq.
Aalisarnermut Isumalioqatigiissitaq ukioq manna marsip qaammataani pilersinneqarpoq, naatsorsuutigineqarporlu isumalioqatigiissitap isumaliutissiissutini 2020-mi juunip qaammataata naanerani tunniutissagaa. Ullorli tunniussiffissaasoq pissutissaqavitsillugu allanngortinneqarsinnaavoq.