Skip to main content

Taekwondomi pissartanngorniunneq: Timersortartut 120-it Paamiuni katersuupput

Arfininngorneq 14. oktober ilanngullugu meeqqaniit utoqqasaanut 120-it Taekwondomi nunatsinni pissartanngorniupput. Taakku unammissutigissavaat Tul/hold-tul, frikamp, breaktest, specialteknik aamma powerbreaking.

Pingasunngornermi unammersuaqataasussat tamarmik oqimaassutsimikkut takissutsimikkullu uuttortarneqarput.

Sisamanngornermi nunatsinni pissartanngorniunneq aallartinneqarpoq, aallarniutaappullu Tul aamma iligiikkaarluni Tul. Unammisaqattaarnerni peqataapput meeqqaniit utoqqasaanut. Ullumikkut angusarissaarnerpaasut arfininngornermi 14. oktober ajugaaniutivinnernut ingerlaqqittussaapput.

Tallimanngornermi unammissutigineqassapput frikampit, arfininngornermilu unammissutigineqassallutik breaktest, specialteknik aammalu powerbreaking minnerunngitsumillu ajugaaniutivinnerit.

Siulittaasup tullia aningaaserisorlu taasissutigineqassapput

Unammisaqattaarnerilli saniatigut aamma kattuffimmi siulittaasumut tullersortissamik aammalu aningaaserisussamik sinniisussanillu Greenland Taekwondo Federation-ip ataatsimeersuarnerani qinersisoqassaaq, ukioq manna ukioq akunnaatsuunngimmat. Ataatsimeersuarneq sisamanngornermi unnukkut ingerlanneqassaaq.

Siulittaasoq Vivi Gudmundsen Lennert assut nuannaarpoq timersuutip siuariartornera pillugu:

- Ukiuni kingullerni pingasuni sungiusaasut aammalu sumiiffinni siulersuisut ineriartortinniarlugit annertuumik sammivagut. Tassami timersuuterput ingerlalluassappat toqqammavia aamma ingerlalluartariaqarpoq, taamaammallu timersuutip patajaatsumik ingerlanissaata saniatigut aamma immikkoortortaqarfinni siulersuisut sungiusaasullu immikkut aallunneqarput.

Tamatuma saniatigut aamma sumiiffinni immikkoortortaqarfiit peqatigalugit nunap immikkoortortaani unammiuaartarnerit atuutsinneqalernikuupput.

- Taamatut ineriartortsitsinitsigut unammisartut akulikinnerusumik sungiusaatigalugu unamminissaminnut periarfissaat annertunerulerpoq, tamannalu timersuummik ingerlataqartut piginnaasaqarnermikkut annertuumik iluaqutigigaat qularinngilara, pitsaassusermi qaffassartuarutsigu aamma nunarsuarmi timersuummik ingerlataqartunut allanut unammillersinnaassuseqarnerput qaffassarparput, siulittaasoq Vivi Gudmundsen Lennert nuannaarluni naammagisimaarinnillunilu Sermitsiaq.AG-mut oqaluttuarpoq.

Immikkut aallussineq angusaqarluarfiuvoq - inuit amerliartuinnartut Taekwondo katersuuffigaat

Vivi Gudmundsen Lennert arlalitsigut nuannaarpoq, tassami ukiuni kingullerni immikkut aallussisimaneq, ilaatigut kursusertitsisarnerit allallu aaqqissuussat ineriartuutaasut aqqusaartorneqarnerisigut sungiusaasut siulersuisullu ineriartuutissaannik aaqqissuussisarnerup saniatigut timersuut annertuumik katersuuffiulersimavoq:

- Ineriartornerput ingerlalluaqaaq. Siorna nunatsinni pissartanngorniunnerni peqataapput inuit 106-it ukiorlu manna peqataapput 120-it, immikkoortortaqarfiillu ilaasortaqassutsimikkut alliartornerminnik unnersiuteqarput, taamaammat aap, assut naammagisimaarinnippunga ineriartornerput pillugu, Greenland Taekwondo Federationimi siulittaasoq, Vivi Gudmundsen Lennert Sermitsiaq.AG-mut oqaluttuarpoq.

Peqataasut tamarmik ajunngillat tamarmillu apuullutik

Ukioq manna nunatsinni pissartanngorniunnerit Paamiut Taikwondo Nattoralimmit aaqqissorneqarpoq, taamaammallu unammersuarnerit Paamiuni ingerlanneqarlutik.

Oqaatigineqareersutut timersortartut 120-it peqataapput. Taakku saniatigut aamma peqataapput sungiusaasut, siulersuisut allallu timersuummi suleqataasartut.

- Peqataasussat tamarmik tikinnikuupput aaqqissuussinerlu pilersaarutit malillugit ingerlanneqarpoq, assut tamatta nuannaarpugut aamma takummaanerit nutaallu tikilluaqqusaanerat tamatsinnut nuannaarutaapput, Henriette Knudsen, Taekwondomi pissartanngorniunnerit Paamiuni ingerlanneqarneranni ataqatigiissaarisuut siuttuat oqaluttuarpoq.

Meeqqat 69-it, inuusuttut 23-it aammalu inersimasut utoqqasaallu 28-it Nunatsinni Taikwondomi pissartanngorniunnermi ukioq manna peqataapput.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER