Taekwondimik unammisartut VM-eqataalersut

Taekwondo-mi nunarsuarmi pissartanngorniunneq, Bulgariami pisussaq, sapaatip akunnerata tulliani aallartissaaq.

Kalaallit nunanut allanut unammisartut arfineq marluk nunarsuarmi pissartanngorniunnernut peqataassasut, nunanut allanut unammisartunut sungiusaasoq Angutinnguaq Tittussen ilisimatitsivoq.

- Unammisartut amerlanersaat inuusuttuaraapput, taakkulu ukiut
marluk ingerlanerini misilittagaat ineriartortinnikuuagut, sungiusaqatigiisittarnerisigut, unammersuarnerillu peqataaffigisartagaat sakkortuliartortinneratigut. Massakkullu timersuutitta iluani unammersuarneq annerpaaq peqataaffigisussanngorpaat. Tamannalu unammisartut piginnaasatigut killiffiinik misiliutaassaaq, nunanut allanut unammisartunut sungiusaasoq oqarpoq.

Periarfissatsialak

Unammisartut pingasut frikampimi unammeqaataassapput, unammisartullu sisamat tul-imi unammeqataassallutik.

- Siunissami Taekwon-do unammisarnikkut ineriartornermut malinnaassagutta, aammalu unammisartut siunissami unammisartakkatik unammillersinnaassappatigit pingaartuuvoq siusittumik unammersuarnerit anginerusut misilittagaqarfigileriissagaat, Angutinnguaq Tittussen oqarpoq.

Peqataasussat:

Inersimasut:

Daniel Platou Kristiansen, frikamp -58 kg.
Lars Lennert Abelsen, 4. dan tul
Angutinnguaq Tittussen, 5. dan tul

Inuusuttuaqqat:

Maasi Davidsen, frikamp -60 kg.
Inukkuluk G. Lennert, frikamp - 69 kg.
Lana Bendtsen, 1. Dan tul
Helga Kielsen Olsen, 1. Dan tul