Taekwon-Do EM

Taekwon-Dortartut marluk EM-ilersut

Pilunnguaq Filemonsen aamma Villads Mølgaard Kalaallit Nunaat sinnerlugu nunat tamalaat pissartanngorniunnerannut peqataassapput

Taekwon-Dortartut Pilunnguaq Filemonsen Uummannameersoq aamma Villads Mølgaard Nuummeersoq, Europami pissartanngorniunnerni apriilip 13-anit 17-anut Grækenlandimi illoqarfimmi Thessalonikimi Kalaallit Nunaat sinnerlugu peqataassapput.

Taakku marluullutik frikampimi aamma tulimi unammissapput. Frikampimi Pilunnguaq Filemonsen 51 kilo tikillugit oqimaassusilinni unammissaaq, Villads Mølgaardilu 71 kilo tikillugit oqimaassusilinni unammissalluni.

Qernertumik qitequtillit
Pilunnguaq Filemonsen tulimi qernertumik qitequtilinni 1. danilinni unammeqataassaaq, Villads Mølgaardilu qernertumik qitequtilinni 2. danilinni unammeqataassalluni.

Angutinnguaq Tittussen sungiusaasutut angalaqataavoq, aamma Lauritz Heilmann Grækenlandimi EM-ertoqarnerani dommeritut angalaqataavoq.

- Nunanut allanut unammiartornissanut Nunatsinni Taekwon-Dortartut Kattuffiata unammiartussanut piumasaqaataat sakkortupput. Unammisartut piareersarluarsimallutit unammiartortarnissaat pingaartinneqarpoq, unammiartornernullu tamakkiisumik sungiusaqatigiinnernut piareersaataasunut peqataasarnissaat. Taamaattumik unammisartut peqataasut piareersarluarsimapput, piffissaq annertooq atorlugu sungiusarnikuullutik, Angutinnguaq Tittussen naqissusiivoq.

Atuaruk: Kalaallit taekwondortartut sisamat EM-eqataassapput

Powered by Labrador CMS