IA-mi siulittaasoq nutaaq
Taasititsineq: Kiap Kuupik kingoraartigissavaa?
Aqqaluaq B. Egede Inuit Ataqatigiinni siulittaasuugallarpoq
Kuupik Kleist Inuit Ataqatigiinni siulittaasuujunnaarluni tusagassiortunut katersortitsinermi Nuummi ataasinngornermi ingerlanneqartumi nalunaarutigaa.
Inuit Ataqatigiit Inatsisartuni ataatsimiittarfianni tusagassiortunut katersortitsineq ingerlanneqarpoq, tassanilu Kuupik Kleistip parteeqatai Inatsisartunullu ilaasortat Sara Olsvig, Juliane Henningsen kiisalu Aqqaluaq B. Egede peqataapput.
IA-p nuna tamakkerlugu ataatsimeersuarnissaata tungaanut Aqqaluaq B. Egede siulittaasuugallassaaq, ataatsimeersuarnissaq maajip 30-ani ingerlanneqassaaq. Ataatsimeersuarnermi siulittaasussamik toqqaanissaq pingaarnertut suliarineqassaaq.
Sara Olsvig, Juliane Henningsen aamma Aqqaluaq B. Egede tusagassiortunut katersortitsinermi peqataanerat nalaatsornerinnaagunanngilaq, tamarmimmi Kuupik Kleist-imut kingoraartissatut piukkunnaateqarput.
Tamarmiullutik siulittaasunngorniunnermi qineqqusaarnissamut ammallutik oqarput, maannakkulli oqaatigisinnaanngikkallarpaat ilumut siulittaasussatut qineqqusaassanerlutik.
Kuupik Kleist Inatsisartuni ilaasortaaginnassaaq. Tulliani Inatsisartunut qinersisoqalerpat marsimi 2017-imi qinigassanngortissanerluni aalajangiusimanngilaa.