Nuummi GU-mut sioorasaarineq

Taamaattumik politiit sakkortuuliorput

Politiit sakkortuumik iliuuseqarnerat Kalaallit Nunaanni Politiini stabschefip nassuiaateeqarfigaa

Politiit pinartoqartillugu akuleruttartui Nuummi Kongevej 11-mi

MALINNAASITSINEQ. 28-nik ukiulik aallaasilik ilinniagaqarfinni aallaasersortunit isumassarsisinneqarsimavoq

Politiit innuttaasunut suli oqaaseqarpallaarsinnaanngillat - pisimasoq pillugu imaluunniit angutip, tallimanngormat Nuummi ilinniarnertuunngorniarfimmi ilinniartunut sulisunullu sioorasaarutai pillugit.

Nuummi ernumasut

Immikkut sungiusarsimasunik Danmarkimit tikisitsisoqarpoq, aammalu sinerissamit politiinik allanik Nuummut tikisitsisoqarluni.

Sermitsiaq.AG-mik atuartartut arlallit Nuummi politiit taama annertutigisumik iliuuseqarnerat paasiuminaatsippaat.

Nittartakkap matuma tusagassiortuanut politiini stabschef Lars Kirkegaard maanna oqarpoq Nuummi innuttaasut taamatut qisuariarnerat paasisinnaallugu.

Toqqissisimanermik pilersitsisut

Maanna akunnerit 24-t sinnerlugit politiit annertuumik iliuuseqarput, paasissutissiissutiginagu sioorasaarutit suusimanersut. Paasisinnaaviuk ilaat isumaqarmata ingasaassisumik iliuuseqartusi?

– Imaalluarsinnaavoq ilaat taamatut isumaqartut. Qulakkiissavarpulli inuit ujorianartorsiunnginnissaat, taamaattumillu inuit qimagussortinneqarput. Qimagussortitsinermi tamanna siunertaavoq.

Sooq pasineqartoq suli tigusarinngilisiuk?

– Qimagussortitsineq assersuinerlu suli ingerlappavut, iliuuseqarnerlu ataavartumik allanngortarpoq. Tassani ilapeqaagut.

Taama sivisitigisoq ingerlareermat ikiortissanillu taama amerlatigisunik illoqarfimmut tikisitsigassi pineqarpa qaartartumeerinissamik imaluunniit sallunaveeqqutigalugu tigusarinninnissamik sioorasaarisimaneq?

– Tamatumunnga oqaaseqartissinnaanngilarma. Oqaannarsinnaavunga oqaatigineqareersutut angut tarnikkut nappaatiliusoq pineqartoq, politiini stabschef Lars Kirkegaard oqarpoq.

Bussit atorlugit qimagussortitsineq

Nuummi GU-mut sioorasaarisutut pasineqartup tigusariniarneqarnerata ilaatut politiit Qimerlua normu 1-19-imut najugallit qimagussortissimavaat.

Bussit marluk atorlugit taamatut qimagussortitsisoqarpoq pasineqartup sumiiffiata eqqaa assersorneqartoq arfininngormat ullaap tungaani annertusineqarmat.

Ajoqusertoqanngilaq

Politiit naapertorlugit nutaamik qimagussortitsineq pivoq najugaqartut isumannaatsuunissaat pissutigalugu, aammattaarli iliuuseqarnissamut inissaqarumalluni.

Piffissami sumiluunniit inunnik ajoqusertoqanngitsoq politiit erseqqissaapput.

´Ingalassimallugu´

Politiit innuttaasunut najugaqartunullu kajumissaarutigaat assersukkat ingalassimaniassagaat.

– Erseqqissassavarput qimagussortitsinerup assersuinerullu ingerlanneqarnerannut pissutaanngitsoq inunnik ajoqusertoqarsimammat. Tamaani najugaqartut isumannaatsuunissaat piinnavillugu iliuuseqarnerupput aammalu politiit iliuuseqarnerat annertusarniarlugu, politeeqarfimmit oqarput.

Powered by Labrador CMS