Taamaammat Partii Naleraq isumaqataanngilaq
Partii Naleraq isumaqarpoq ikiuigasuarnissamut suliniutit inuussutissarsiornerup iluani atorneqalersut "ajalusoornerup tamallu oqartussaaneranik suunngitsutut isiginninnermik takutitsisut".
Aningaasaqarnermut ataatsimiititaliaq Naalakkersuisut qinnuteqaataannik, sulisartunut inuussutissarsiornerullu iluani ikiorsiissutissanik imaqartumik, sisamanngornermi suliarinnilermata, Partii Naleraq aalajangerpoq qinnuteqaammut itigartitsiniarluni.
Email-ikkut ajutoorneq
Partiip ikinnerussuteqarluni oqaaseqaataa aningaasaqarnermut ataatsimiitialiap siulittaasuanut apuunneqanngitsoorput, taamatullu Naalakkersuisunut apuunneqanngitsoorlutik, ullumikkut nalunaaqutaq 10.00 kingusinnerpaamik piffissaliussaammat. Inatsisartuni IT-kkut nutarterisoqarnera pissutaannguatsiarpoq, partiip ikinnerussuteqarluni oqaaseqaataata tigusisussanut apuutinngitsoorneranut.
Sermitsiaq.AG-p ikinnerussuteqarluni oqaaseqaat pissarsiaraa. Partii Naleraq tassani tunngavilersuuteqarpoq suliffeqarfiit ikiorserneqarnissaannut qinnuteqaatigineqartoq pillugu aalajangernerminut.
Oqaaseqaat tamakkerlugu:
Oqaaseqat aajuna:
- Partii Naleqqamiit ersarissumik nalunaarutigereerparput nunatta pitsaanerpaamik ajalusoornermit, covid-19 pissutigalugu nunarsuaq tamakkerlugu soorlu taamaattoqartoq, qaangiinissaanut suleqataassalluta.
- Ajuusaarnaraluartumik qinnuteqaatip takutippaa politikkikkut suliaqartut akimorlugit suleqatigiinnittoqassanngitsoq taamatullu nunarsuaq tamakkerlugu tunillaassuuneq pimoorullugu tiguneqanngitsoq.
- Apeqqutaaginnanngilaq piffissami tullermi 1, 2 imaluunniit 3 milliaardit koruunit atorneqassanersut. Apeqqutaavorli aningaasat suminngaanniit aaneqassanersut. Suliniutit angisuut sorliit unitsinneqassanersut, ajalusoornerullu Covid-19-ip, inuiaqatigiinni matusinerugallartumik kinguneqartup, kingorna qaangiinissamik qanoq qulakkeerisoqassanersoq.
- Apeqqutinut ilaavoq inuit teknikkikkut pikkorissut tikkuussinerat maliinnarnagu, aammali politikkikkut akisussaaffimmik tigusilluni siusinaartumik mianersortumik iliuuseqarsinnaaneq. Oqaluuserineqarnissaminnut ilaat kingusinaareersimasinnaapput, Partii Nalerarli suli isumaqarpoq ajalusoornerup aningaasaqarnikkut kingunissai Aningaasanut Inatsimmut nalimmassaassutigineqartariaqartut.
- Nalimmassaanermi naammanngilaq kikkut tamat akuersinerat, oqalliseqataallunili ilusilersueqataaneq pisariaqarpoq.
- Qinnuteqaammut uunga akuersinikkut takutinneqarpoq ajalusoorneq tamallu oqartussaanerat, taamatullu innuttaasut ajalusoornermit minnerpaamik eqqorneqarnissaat anguniarlugu allannguutissaqarsinnaanermut periarfissat, suunngitsutut isigineqartut.
Oqaaseqaat naavoq.
Paasinninngitsut
Partiit arlallit issuarneqanngikkaluarlutik oqariartuuteqarput paasisinnaanagu sooq Partii Naleraq pisumut politikkikkut iluanaarniarnersoq. Pisut immikkut illuinnartutut nalilerneqarput, namminersorlutillu oqartussat siornatigut taama pisunik ittumik misigisaqarsimanngisaannarlutik.