Taaguutinik allanngortitsesoqareersoq dronningi: Joachimip qisuariaatai sunnertinnarput
Prinsip qitornaasa prinsetut prinsessetullu taaguutaat annaaneqassasut kunngikkormiut ilisimatitsipput sapaatip akunnerata siuliani.
Prins Joachiamip meeraasa taaguutaannik allanngortitsisoqarnissaa pillugu attortisimaarnera droninngi qisuariaateqarpoq. Taamatut prins Joachim attortisimassasoq droninngimit naatsorsuutigineqarsimanngikkaluarpoq.
Tamanna dronningip tusagassiutinut nalunaarutigaa.
- Dronningitut, anaanatut aanaatullu una aalajangiussaraara. Anaanatut aanaatullu aalajangernera taama eqquissasoq naatsorsuutigisimanngikkaluarpara.
- Eqqorneqartut attortisimaarput, tamannalu aamma uanga attortisimaffigaara, nalunaarummi oqarpoq.
Pereersimasut siunissarlu isigineqartariaqartut
Prinsip qitornai prinsessetut prinsitullu taaguutitik annaagaat kunngikkormiut sapaatiup akunnera kingulleq nalunaarput.
Taamatut aalajangerniarneq sivisusimasoq dronningi oqarpoq.
- Ukiuni 50-ni dronningiuninni pissusissamisoorpoq pisimasut siunissarlu qiviarnissaat. Kunngikkormiut piffissamut naleqqussarnissaat Dronningitut kissaatiginikuuara.
- Tamannalu pissutigisaanik imaannaanngitsunik aalajangiisoqartariaqartarpoq, tamannalu qaqagu avammut nalunaarutiginissaa aamma imaannaasimanngilaq.
Dronningip aalajangiinera pillugu prins Joachim sakkortuumik qisuariaateqarpoq sapaatip akunnera kingullermi. Prinsip meeraasa prinsessetut prinsitullu taaguutitik annaasussanngorlugu paasigamikku attortissimallutik oqarsimasut prins Joachim oqarpoq.
Nalimmassarneq pisariaqartoq
Taamatut oqariartuuteqartoqarsimanerata pissutigisaanik dronningi maanna qisuariaateqarpoq.
- Kunngikkormiusut atuuffeqarnermi pisussaaffeqartoqarpoq, pisussaaffiillu kunngikkormiunit siunissami ikinnerusunit akisussaaffigineqalissapput.
- Taamatut nalimmassarneq pisariaqartuusoq isumaqarpunga, Kunngikkormiullu ataannarnissaannik tikkuussinerusoq aalajangerninnut pissutaavoq, dronningi nalunaarpoq.
Eqqissisimatinneqarnissamik piumasaqartoq
Meeqqani, meeqqamilu kinguaavi "nuannaalersitisuusarlutillu tulluusimaarutaasartut", dronningip naqissuserpaa.
- Maanna aalajangerneqalersimasumut eqqissisimatinneqarnissarput kissaatigaara, allappoq.
Prins Joachimip qitornai sisamat siunissami taaguuteqalissapput Monpezap grevii komtesselu.
Prins Joachimip Alexadrallu meerai 23-nik ukiulik Nikolai aamma prins Joachimip Marie-llu qitornaat Henrik 13-nik ukioqartoq aamma qulinik ukioqartoq Athena prinsessetut prinsitullu taaguutaat allanngussapput.
Meeqqat siunissamut nammineerlutik ilusilersuinissaat pingaartillugu taaguutaat allanngortinneqarnissaat kunngikkormiunit nalunaarutigineqarnikuuvoq.