T-celleterapi kræftertunut 'katsorsarneqarsinnaanngitsunut' nutaamik periarfissiivoq

Napparsimasut 20 procentii annissamikkut kræfteqarnerminnit katsorsarneqarsimasut danskit hollandimiullu annertuumik misissuinerisa takutippaa. 'Nutaamik pisoqartitsisoq', kræfti pillugu ilisimatusartoq isumaqarpoq.

T-celleterapi timip akiuussutissaanik katsorsaat, annissakkut kræfteqarnermut nalinginnaasumik katsorsaaneq iluatsinngippat, kræfterlutik napparsimasunik katsorsarneqarsinnaanngikkaluartunik nutaamik periarfissiisinnaavoq.

Misissuineq danskinit aqunneqartoq tunuliaqutigalugu, Videnskab.dk taama allaaserisaqarpoq.

Nakorsaaneq aamma ilisimatooq Inge Marie Svane misissuinermik ingerlatsisuuvoq, taannalu The New England Journal of Medicinemi saqqummersinneqaqqammerpoq.

2014-imi katsorsaanermik misiliut T-celleterapimik taaguuteqartoq, Hollandimi Amsterdamimi kræftertunut peqqissaavik Netherlands Cancer Institute peqatigalugu aallartippaa.

T-celleterapimi aap qaqortortai T-cellenik taaneqartartut tiguneqartarput, taakku timimi aseruunnernik akiuisarput.

Laboratoriami cellet akiuussutaasut aallartinneqartarput, ilaatigullu napparsimasup aavanut ingerlaarteqqinneqannginnerini aalajangersimasumik pissusilersortussanngortinneqartarput. Immunterapip T-celle toqoraasunngortittarpaa, kræftip celleannik toqutsisinnaasunngortillugit.

- Ukiuni arfineq-pingasuni misissuivugut, taamalu pitsaatigisumik kinguneqarnissaa takorloorneqarnikuunngilaq, taamaattumik assut naammagisimaarnarpoq, Inge Marie Svane, Nationalt Center for Cancer Immunterapimi Herlevimi aamma Gentofte Hospitalimi aqutsisoq, Videnskab.dk-mut taama oqarpoq, nangillunilu:

- Nakorsatut ilisimatusartutullu misigisanni tamanna annersaavoq.

Tamannalu Henrik Schmidtip, Aarhus Universitetimi nakorsaanerup aamma lektoriusup paasisinnaavaa.

- Ilisimatusarneq 'nutaamik pisoqartitsiffiuvoq', taanna Videnskab.dk-mut oqarpoq.

- Sunniuteqarluarsinnaasumik iluatsitaqarput. Tamannalu immini pitsaalluinnarpoq.

20 procentii kræfteqarunnaartut

Tamannali ilisimatusartunuinnaq ajugaanerunngilaq. Napparsimasunut aamma ajugaaffiuvoq.

Napparsimasut danskit hollandimiullu 168-it misiliuteqarnermut peqataapput, tassani misiliuteqarneq 2014-imi aallartimmat, T-celleterapi nalinginnaasumik nakorsaammik Ipilimumab-imik katsorsaanermut sanilliunneqarpoq.

Misileraanermi T-celletrapimik katsorsarneqartut 48 procentingajai sunniuteqarneranik misigisaqartarput – allatut oqaatigalugu: Kræftit minnerulertarput, timillu akiuussutissartaasa kræftimik akiuinerannik tamanna isumaqarpoq.

Sulilu tupaallannarneruvoq: Napparsimasut 20 procentiini kræfti nunguissimavoq. Eqimattanut Imilimumap-imik nakorsaaserneqartunut sanilliukkaanni taakku 7 procentiinnaapput.

- Ataavartumik sunniuteqartartut assiliinerit takutippaat. Napparsimasut siornatigut katsorsarneqarsinnaanngitsut katsorsarsinnaalernerinik tamanna isumaqannguatsiarpoq, Inge Marie Svane Videnskab.dk-mut oqarpoq.

Henrik Schmidtip oqarnera naapertorlugu inernerit »pitsaalluinnarput«.

- Napparsimasut amerlasuut tamakkiisumik qisuariaateqartarput. Tassa nappaat ersittoq tamarmiusoq, katsorsarneqarnerminni kræfti nunguttarluni, Henrik Schmidt oqarpoq.

- Napparsimasut 20 procentiisa missaanniittut annissamikkut kræfteqarunnaavittarput, tamannalu pitsaalluinnarpoq – aamma immunterapimik Ipilimumab-imut sanilliullugu, taanna nassuiaavoq.

Nakorsiartut T-celleterapimik katsorsarneqartut nakorsiartunit Ipilimumabimik katsorsarneqartunit inuummarinnerusartut, inernerit aamma takutippaat.

- T-celleterapi katsorsaaneq sakkortuvoq, sapaatip-akunnerini marlunni pingasunilu katsorsarneqarnermi amerlasuunik kingunerluuteqartitsisartoq. Kisianni napparsimasut katsorsaaneq naammassereeraangat ulluinnarni suliatik sukkasuumik ingerlatileqqillugillu nalinginnaasumik inuusinnaalertartut, misissuinerup aamma takutippaa, Inge Marie Svane oqarpoq.

Katsorsaariaaseq akuerineqassaaq

Inge Marie Svanep suleqataalu Hollandimiut maanna katsorsaanerup Europami nakorsaatinut tunngasunik akuersissuteqartartunik (EMA)-mit akuerineqarnissaa angunialerpaat, anguniagassarlu taanna aamma annertuvoq, taanna oqarpoq.

- Piffissaq sivisooq atorneqassaaq, taanna Videnskab.dk-mut oqarpoq.

Angusalli pitsaammata taanna suleqatinilu Danmarkimi aamma Hollandimi katsorsaanissamut siusinaarluni atuisinnaalernissamut oqartussanut qinnuteqareerput, katsorsaanissamut atortut taakkunani pigineqareermata.

Powered by Labrador CMS