nappaatilipuit
Syfilisip atugaanersua Dorisip tupassutigaa
Peqqinnissamut Naalakkersuisup Doris Jakobsenip, kinguaassiuutitigut nappaatit akiorneqarnerat sakkortusarniarpaa
Taamatut nalunaaruteqarpoq peqqinnissaqarfimmit qanittukkut nalunaarusiakkut mianersoqqussutigineqarmat syfilis nutaamik tuniluutilersinnaasoq.
– Tupannaqaaq syfilisip atugaanera annertusiartoqqimmat. Ilisimatitsissulli nutaaq nuannaarutigaara. Tamatuma kinguneranik peqqinnissaqarfimmi kinguaassiuutitigut nappaatinik misissortinnissamut neqeroorut pissutsinut naapertuuttuunissaat misissortariaqarparput, naalakkersuisunut ilaasortaq tusagassiorfinnut nalunaarummi allappoq.
Suliniuteqarneq annertusillugu
Kinguaassiuutitigut nappaatit, nappaatillu tuniluuttut allat atugaaleriartornerat nakorsaaneqarfiup nakkutigaa. Politikerillu nakorsaaninngortussaq, oktobarip aallaqqaataani atorfinittussaq, Peqqissutsimut Pinaveersaartitsinermullu Aqutsisoqarfik peqatigalugu ataatsimeeqatiginiarpaa. Taakkua oqaloqatigiissutigissavaat kinguaassiuutitigut nappaatit qanoq isilluni annertunerusumik akiorniarneqarsinnaanersut.