Syfilisimut misissortinnissamut napparsimmaveqarfik kaammattuisoq

Kinguaassiutitigut nappaat syfilis nunatsinni tuniluunneqauleqqinnera, nunatta peqqinnissaqarfianut unammillernartuuvoq.

Kinguaassiutitigut nappaat piffissami sivisuumi tuniluussutaasimanngeriarluni, ukiuni kingullerni annertunerusumik tunillaassuuteqqilersimavoq. 2020-mi syfilisimik nappaateqartut 140-t paasineqarsimapput.

Innuttaasut syfilisimik tunillatsissimasinnaanermik pasittaassaqartut misissortinnissaat, Qeqqani qitiusumik peqqinnissaqarfiup maanna kaammattuutigaa. Kaammattuut Facebookikkut 184-eriaq siammarneqareerpoq.

Kaammattuinerli Qeqqani kisimi pinnani, nunatsinni innuttaasunut tamanut kaammattuutaavoq.

- Syfilis nunatsinni nunguinnikuugaluarpoq. Ukiulli arfineq-marluk kingulliit tunillatsissimasut amerliartuinnarput. Nunatsinni sumiikkaluaraanniluunniit tunillatsissimasoqartarpoq, nunatta nakorsaanera Henrik L. Hansen Sermitsiaq.AG-mut oqarpoq.

Misissortinneq illersuuteqarnerlu

Syfilisip siaruaassimanerujussua nunatta nakorsaanerata ernumanarluinnartutut isigaa. Nappaammi pilertortumik nakorsarneqanngikkuni ajorluinnartumik kinguneqarsinnaavoq.

- Katsorsarneqanngikkuni ajorluinnartumik kinguneqarsinnaavoq, sianiuteqarfitsigut napparsimalertitsisinnaagami. Gonoremit klamydiamiillu sakkortunerujussuarmik kingunerluuteqarsinnaavoq, Henrik L. Hansen oqarpoq.

Sisimiuni qitiusumik peqqinnissaqarfik innuttaasut tunillatsissimanermik pasitsaassaqartut misissortinnissaat kaammattuutigaa.

- Kinguaassiuutitigut qanikkulluunniit ikeqaruit annernanngitsumik mamikkuminaatsumillu, allagisannillu ungilanngitsunik annernanngitsunik naajorarneqaruit nakorsiartarfik saaffigineqarsinnaavoq, Qeqqani qitiusumik peqqinnissaqarfik allappoq.

Nunatta nakorsaanerata syfilis nunatsinni tamarmi ajornartorsiutaasoq erseqqissarpaa. Atoqatigiinnermi usuup puua kisimi nappaammut illersuutaavoq.