Sverigimi ilinniartoq Inatsisartunut qinigassanngortittoq
Naak ulluinnarni Sverigimi ilinniartuugaluarluni, 28-nik ukiulik Suinni Fleischer Johansen Inatsisartunut qinersinermut sassarnissaminut piareerpoq
Siumup inuussuttaanut ilaasortaq, Suinni Fleischer Johansen, Lunds Universitetimi Sverigemi ilinniartuuvoq, taassuma sociologiimi kandidatitut ilinniarnini aasaru inaartussaavaa.
Taanna aamma Siumut tunuliaqutaralugu qinigassanngortinnissaminut piareerpoq, taamaattumillu kalaallit nunani allani ilinniartut qinigassanngortinnissamut periarfissaqarnerat nuannaarutigaa.
Nutaamik periutsimik akuersisoqarsimasoq Siumut kommuninut, nunaqarfinnut, isorliunerusunut, attaveqaqatigiinnermut ineqarnermullu naalakkersuisoqarfimmit ilisimatinneqarpoq, kalaallit ilinniartut taamaalillutik ukiup affaanik Nunatsinniissimanissaannik piumasaqaammut ilanngunneqannginnissaminnut ukiunik marlunnik periarfissaqalerlutik. Siornatigut ilinniartut qaammatini arfinilinni Nunatsinni najugaqareersimatillutik aatsaat qinigassanngortissinnaagaluarput.
Ukiuni sisamani utaqqinianngitsoq
Suinni Fleischer Johansenip taamaattumik nutaamik periuseqalerneq nuannaarutigaa.
- Siumup Inuusuttunut Suleqatigiiffiani 2015-imili ilaasortaavunga, inuiaqatigiinnilu unammilligassanik aaqqiissutaasinnaasunik ujartuiniarlunga aalajangersimasumik nunami allami ilinniarnissara aalajangiuteqqammerpara. Maanna qinersinissaq nalunaarutigineqarpoq, periutsimit nutaamut taamaammat ilaanngilanga, kisianni qujanartumik naalakkersuisoqarfik sukkasuumik sulivoq, taanna oqarpoq, ilinniartut qinigassanngortinnaanngortimmatigit naalakkersuisoqarfik nersualaarpaa.
- Ilinniakkappit naammassiniarnerata saniatigut Inatsisartunut qinigaassaguit suliassarujussuaqassanngilatit?
- Soorunami ilinniakkama naammassereernerata kingorna qinersisoqarsimanissaa tulluartinnerugaluarpara. Kisianni naalakkersuinikkut sulinissamut piareersimasutut misigisimagama, Inatsisartunut qinigassanngortinniarlunga ukiuni sisamani utaqqeqqikkusunngilanga, Suinni Fleischer Johansen akivoq, taassumalu Inatsisartunut qinigaaguni qinigaanngikkuniluunniit ilinniakkani naammassiniarlugu naqissuserpaa.