Sverigemi naalakkersuinikkut ajornartorsiorneq: Qinersisoqaqqinnissaa qaninnerulersoq
Sverigemi suli naalakkersuisoqatigiinnik pilersitsisoqanngilaq. Riksdagenimi ilaasortat 200-t Stefan Löfvenip svenskit naalakkersuisuini ministeriunertut inissinnissaa itigartitsissutigaat.
Naatsorsuutigineqareersutut, socialdemokratit siuttuata Stefan Löfvenip ministeriunertut issiaqqinnissaminut sinnattua, Riksdagenimi tallimanngornermi ullaap tungaa taasissutigineqarmat, sequminneqarpoq.
200-it Löfvenimut naaggaarlutik taasipput, 116-it akuersisut, 28-llu taasinatik.
Tamanna isumaqarpoq Riksdagenimi siulittaasutut issiasoq, Andreas Norlén, qinikkat amerlanerussuteqartut tapersersorsinnaasaanik ministeriunerusussamik suli ujaaseqqittariaqartoq.
Centerpartip siuttua, Annie Lööf, taasineq sioqqullugu Riksdagenip oqaluttarfianit oqarpoq, Centerpartip iluani assigiinngitsunik isumaqartoqartoq, Stefan Löfven naalakkersuisuni siuttunngornissaa pillugu.
Partiili, naalakkersuisunik nutaanik inissiisoqarnissaa anguniarlugu, naaperiutissamut suli piareersimasut, tallimanngornermi ullaakkut oqarpoq.
- Akisussaaffimmik tigusinissamut piareeqqavugut, akisussaaffilli annerpaaq partiini annerpaani marlunniippoq, taakku siumut ingerlasariaqalerput, Lööf nutaarsiassaqartitsivik TT malillugu oqarpoq.
Centerpartiet saniatigut Moderaterna, Kristdemokraterna, Liberalerna aamma Sverigedemokraterna Löfvenip siuttunngornissaanut naaggaassallutik nalunaareersimapput.
Partiit taakku tallimat 200-t sinnerlugit ilaasortaatitaqarput. Inatsisartuni ilaasortat ikinnerpaamik 175-it itigartitsillutik taasisussaapput Löfven siuttutut taaneqassanngippat.
Löfven Riksdagenimit septembarip naalernerani siuttutut tunuartinneqarpoq maannalu ikaarsaariarnermi naalakkersuisunik ingerlatsigallarluni.
Riksdagenimit taasissutigineqartuni tulliuvoq, Moderaternit siulittaasuat, Ulf Kristersson, qaammatip ataatsip matuma siorna taasissutigineqarluni itigartitsissutigineqarsoq.
Riksdagenip partiivisa Sverigep qinerseqqittariaqalerneranut qallisitsivoq, Riksdagenip siulittaasua, Andreas Norlén, oqarpoq. Taanna “alloriarnissamut tullermut piareersassalluni” maanna aallartisarpoq.
Qinerseqqinnissamut nutaamut piareersartoqalernera siullermeerluni aatsaat oqaatigineqarpoq.
- Nalilersinnaalerpara Riksdagenip partiivisa Sverigemi qinerseqqinnissamut qallisitsisut, nalunaarutigineqarpoq.
- Ajuusaarnarpoq, tamannalu pinngitsoortinniarlugu sulissaanga, partiilli naalakkersuisut siuttussaannik taasinatik qinerseqqinnissamik taasissappata tamanna unitsinniassanngilara. Taamaammat tassunga alloriarnerup tungaanut piareersaateqartariaqarlunga nalilerpara.