Skip to main content

Svend Hardenberg piareersarpoq

Juulip aallaqqaataani Siulittaasup Naalakkersuisoqarfiani pisortatut atorfimminut ikkutinnginnermini selskabimit Greenland Invest-imit tunuarpoq

Siulittaasup Naalakkersuisoqarfiani pisortanngortussap Greenland Investimi inuttut soqutigisani atorunnaarsileruttorpai. Taamatuttaaq iliorpoq Kommune Kujallermi borgmesteri Jørgen Wæver Johansen.
– Juulip aallaqqaataani atorfittaannut ikkukkuma inuttut soqutigisanit qilersorsimanngilluinnarniarpunga, namminersorlutik oqartussani akisussaaffikka tamakkiisumik ingerlanniassagakkit, Svend Hardenberg nassuiaavoq.
Taassuma 2011-mi Nukissiorfinni pisortatut tunuaramili Jørgen Wæver Johansen aamma Rasmus C. Rasmussen peqatigalugit Greenland Investimik piginnittuusimavoq, taannalu suliniutinik ineriartortitsinermik suliaqartuuvoq, tamatumani ilanngullugu imermik annertuumik avammut tuniniaaneq. Tamanna siusinnerusukkut tusagassiorfitsigut eqqartorneqarsimavoq.
Svend Hardenberg 2013-imi marsimi Qaasuitsup Kommuniani kommunaldirektøritut atorfeqaleramili Greenland Investimi sulisimanngilaq, akerlianik selskabimit tunuarnissani sulissutigisimavaa.
Greenland Investip ilaatigut Kina Nunatsinni suliniutinut assigiinngitsunut aningaasaliissuteqartinniarsimavaa. Tamatuma kingunerisaanik juulip aallartinnerani Kinami ingerlatsivinnit aallartitat 18-it Kalaallit Nunaannut tikissapput. Suliaq tamanna piareersarneqalersimavoq 2012-imili, Svend Hardenbergip Qaasuitsup Kommuniani atorfininnissaa Jørgen Wæver Johansenillu Kommune Kujallermi borgmesterinngornissaa sioqquterujussuarlugit.
Isertuussaqarsimanngilaq
– Soorunami nuannaarutigaara kiisami tamanna piviusunngulermat Kinamiullu ingerlatsivii Nunatsinnukassallutik immaqalu suleqatigiittoqalissalluni. Uangali Jørgen Wæver Johansenilu ingerlatsivimmit tunuaratta Rasmus C. Rasmussenip Kinamiut tikilluaqqussavai. Aamma ingerlatsivik taassumalu ingerlannera Rasmus C. Rasmussenip tigusimavai.
– Qaasuitsup Kommuniani namminersorlutillu oqartussani atorfinitsitsisutut oqartussaasut uanga inuttut soqutigisakka ilisimasimavaat, tamakkualu isertuunneqanngisaannarsimapput. Aappaatigut nalunngilara atorfinitsitaaninnut atatillugu iluaqutaasimasoq namminersortutut inuussutissarsiornermik misilittagaqarnera, aammalu siusinnerusukkut selskabinik angisuunik nunanit tamalaaneersunik isumaqatigiinniuteqartarsimanera. Ilaatigut Alcoa-mi suliniummi isumaqatigiinniarnermut ataatsimiititaliami ukiuni tallimani siulittaasuusimavunga. Isumaqarpunga atorfinitsitaaninnut tamanna pissutaaqataasimasoq, Svend Hardenberg oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER