Svend Hardenberg KNI-mi atorfimmit qaffasissumit tunuarpoq

Sven Hardenberg KNI-mi siulersuisuni siulittaasutut ukioq ataasiunngitsorluunniit atorfeqareerluni, atorfiup allamut ingerlateqqinnissaanut piareerpoq. Suliassaq naammassivoq, taama oqarpoq.

KNI-mi annertuumik kusanaatsuliortoqarnerata kingorna pisortaq aamma siulersuisuni siulittaasoq siorna taarserneqarput. Oktobarimi ataatsimeersuartoqarnerata kingorna siulersuisuni siulittaasoq nutaaq atorfinittoq, ataatsimeersuartoqaqqilerpat qinigassanngorteqqinnianngilaq.

- Annertuumik torersaalluni suliaq naammassisutut nalilerpara. Siulersuisunilu siulittaasutut atorfiga naammassisutut nalilerlugu, Svend Hardenberg, Sermitsiaq.AG-mut taama oqarpoq.

Svend Hardenbergip suliassaq taanna siorna akuerisimallugu nassuiaavoq, taamaammallu suliassaq naammassimmat ingerlaqqinnianngilaq.

KNI A/S-ip siulersuisui 2020-mi ingerlatseqatigiiffiup nioqqutissanik uninngasuutaanik annertuumik misissuinermik aallartitsivoq, kinaassutsimik isertuussisumit nalunaartoqarnerata kingorna tamanna pivoq, pisortaasimasorlu unnerluutigineqarpoq, sulisunullu arlalinnut kannguttaatsuliorsimasutut eqqartuunneqarluni.

Torersaaneq ilungersunartoq

Siulersuisunut siulittaasuujunnaartoq aallartinnerminiilli piffissaq annertooq sulinermut atorsimallugu oqaluttuarpoq.

- Ingerlatseqatigiiffiup oqimaaqatigiissaarneqarnerata nutaap nassaariniarnera sivisuumik suliarineqarpoq, pigisat nalillit torersarneqarlutik, kiisalu ingerlateqqinneqarnissaanut sinaakkutit piginnittut aningaasaliisullu peqatigalugit qulakkeerniarneqarluni, tassunga piffissaliussaq sivikissimavoq, tassa piffissami ingerlatseqatigiiffiup naatsorsuusiorfiata ingerlanerani.

Pisortaaneq nutaaq peqatigalugu tamanna ingerlavoq, taannalu aamma aqqutaani “aallartisarneqarpoq”.

- Illuanik ingerlatseqatigiiffiup naatsorsuutaanik annertuumik sivisuumillu peqquserluttoqarnerata kingorna ilungersunarpoq, illuanillu ingerlatseqatigiiffiup piviusumik inissisimanera paasiniarneqarluni, peqatigisaanik kiffartuussinermut isumaqatigiissutit isumaqatiginninniutigineqarput, tassanilu piginnittut aningaasanut inatsimmik nikingatitsinaveersaarnerminnik unammilligassaqarnikuupput, Svend Hardenberg oqaluttuarpoq.

Piginnittut naammagisimaarinnittut naatsorsuutigaa

Torersaanerup peqatigisaanik suliffeqarfik ikummatissat aamma pisiniarfinni nioqqutissat akiinik allanngutsaalineqarnissaannik akit ineriartornerinik nakkutiginnittariaqarpoq, Ukrainemi sorsuttoqarnerani akinut sunniuteqartumik aningaasat naleerukkiartormata.

Torersaanermut tunngatillugu aamma aalajangersimasunik alloriartoqartoq, Hardenberg oqaluttuarpoq.

- Peqquserlunnermut akisussaaffimmik inissiinissamut periusissiortoqarpoq, suliallu taassuma ingerlallualereerneranik tamanna isumaqarpoq, kingusinnerusukkullu naammassineqassaaq. Eqqartuussivimmi suliami siullermi aallartinneqartumi KNI A/S-imut tapersiisumik eqqartuussuteqartoqarpoq, eqqartuunneqartorli 5. augustip tungaanut suliassanngortitseqqissinnaanerminut piffissaqarpoq.

Tamatuma saniatigut suliffeqarfimmut periusissaq nutaaq aallartisarneqarpoq, ukioq mannalu decembarimi naammassinissaa naatsorsuutigineqarpoq.

- Piginnittut inerneranik nuannaarutiginnittut qularinngilara, KNI-mi siulittaasutut tunuartoq naammagisimaarinnittoq naggasiivoq.

Powered by Labrador CMS