Svend Hardenberg erngup nukinganik nukissiorfiliorniarneq pillugu: - Inuiaqatigiit aningaasaqarnerannut allannguissaaq
Inuit Development Company Tasersiami erngup nukinganik nukissiorfiliorsinnaanermut pilersaarumminik ingerlatsiinnarsinnaanngorluni akuersissummik pissarsisimavoq. Suliniut Kalaallit Nunaanni aningaasaqarnermut allannguisinnaasoq, Svend Hardenberg isumaqarpoq.
Pilersaarut tamarmiusoq piareeqqavoq.
Inuit Development Company ApS Tasersiami erngup nukinganik nukissiorfiliornissamut pilersaarusiorsimavoq, piffissaq ungasinnerusoq eqqarsaatigalugu aluminiumik aatsitsisarnermut iluaqutaasussat nukiit annertoorujussuit atorneqarsinnaanngussallutik.
Inuit Development Company ApS-imi pisortaaneq Svend Hrdenberg taamatut oqarpoq.
Ingerlatseqatigiiffik misissueqqarnissamut akuersissummik pissarsinissamut piffissami sivisuumi utaqqisimavoq.
Tassa ingerlatseqatigiiffik pilersaarusiarineqaqqaarsimasut ilusilersorneqarnerat eqqortuunersut ajunngitsumillu ingerlassanersut - imaluunniit allanngortinneqassanersut misilerarneqarnissaannut akuerineqarsimavoq. Ingerlatseqatigiiffimmit naatsorsorneqarsimavoq, tamanna ukiunik pingasunik sivisussuseqassasoq. Aningaasartuuteqarfiusussaavorlu.
Sullissinerit kinguaattoorfiusimasut
Inuit Development Company ApS-imit nalilerneqarsimavoq, suliniut 290 millioner koruunit angullugit akeqassasoq.
- Misissueqqaarnissamut akuersissummik pissarsigatta, aningaasaliissuteqartarfissuarmik ataatsimeeqateqarsimavunga. Misissueqqaarnerup ingerlanneqarneranut tamanut aningaasaliissuteqarniarlutik neriorsuereerput, Svend Hardenberg nassuiaavoq.
Ingerlatseqatigiiffimmit atortussat maanna naammassillugit suliarineqassapput, aningaasaliissuteqartarfiup taakku suliariniassammagit. Aqqutissarpulli aporfeqanngitsoornavianngilaq.
Svend Hardenbergip ilisimatitsissutigaa, ingerlatseqatigiiffimmi misissueqqaarnissamut akuersissummik piniarsimaneq kinguaattoorfiusareersimasoq.
- Ingerlatsinitsinni unammillernarnerpaasussaq tassaagunarpoq, sullissinermi amerlanerusunik kinguaattoortoqarsinnaanera:
- Ukiuni aggersuni misissueqqaarnissatsinnut aningaasarpassuit atortussaavagut - ukiumut 100 millioner koruunit missaanniittut - taamaammat suliat ajungitsumik ingerlanneqarnissaat pingaarutilipilussuuvoq.
Svend Hardenbergip oqaatigaa, annikitsunnguamilluunniit kinguaattoortoqarnea annertuunik aningaasartorfiussasoq, Tasersiami aasaasarnera sivikitsunnguusarmat.
Unammisitsisoqarsimasoq
Maajip qaammataani nalunaarutigineqarpoq, erngup nukinganik nukissiorfiliassat suliariumannittussarsiuunneqarnissaannik Naalakkersuisut pilersaaruteqartut, tassani isumalluutinik taakkunannga annertuunik atuisinnaaneq pilerinarsarniarlugu.
2021-mi ukiakkut ataatsimiittoqarnerani Inatsisartut Naalakkersuisunut peqqusimmata, erngup nukinganik nukissiorfiliornianerup nittarsaanneqarnissaannut pilersaarusiussasut, taamatut aalajangertoqarsimavoq. Naalakkersuisut tassunga atatillugu ilippanaatit nittarsaanneqarnissaannut unammisitsisimapput.
Inuit Delvelopment Company ApS-imut tamanna tupaallannalaarsimavoq, tamatumalu kingornatigut pilersaarutaasutut unammilleqatigiinnermut peqataaqquneqarsimallutik.
Erngup nukinganik nukissiuuteqarnermut inatsit
Tamanna ingerlatseqatigiiffimmit kissaatigineqarsimanngilaq.
Tamatumunnga siullertut pissutaavoq, ingerlatseqatigiiffimmit - Svend Hardenberg naapertorlugu - unammisitsisoqarnissaanik suli nalunaaruteqartoqanngitsoq, pilersaarusiornermut piffissarujussuarmik isumalluuterpassuarnillu atuisoqareersimanera.
Inuit Development Company-mit aamma nalunaarutigineqarpoq, tamanna suliniummut kinguarsaataassasoq.
Svend Hardenbergip akerlianik kissaatigaa, erngup nukinganik nukissiuuteqarnermut inatsit naapertorlugu suliarinnittoqassasoq, tassa pilersaarutit malillugit suut tamarmik ajunngitsumik ingerlassappata tunisassiorneq 2029-mi aallartinneqarsinnaanngorlugu.
Brint aluminiummiluunniit
Svend Hardenbergilu annertuunik pilersaaruteqarpoq. Erngup nukinganik nukissiorfiliorniarnerup saniatigut aluminiliorfimmik sanaartortoqassaaq, tassani nukiit aniatinneqartut pitsaanerpaamik atorneqarnissaat anguniarlugu.
- Suliffinnik akissaatigissunik patajaattunillu 1.500-t angullugit amerlassusilinnik pilersitsinerussaaq. Inuiaqatigiit aningaasaqarnerannut allannguissaaq. Nalunngereerparput, nunami kaaviiaartitat ukiumut miliiunit marluk affaasa aamma to milliarder koruunit akornanni annertunerulersinneqassasut.
Svend Hardenbergip Sanaartornermut Aatsitassanullu Ataatsimiititaliamut siunnersuutigisimavaa, Tassartuup Tasersiaanut tunngatillugu taamaallaat unammisitsisoqartariaqartoq, ilisimatitsissutigineqarsimasoq naapertorlugu erngup nukinganik nukissiorfiliornissamut suli naleqquttunik qinnuteqartoqarsimanngimmat.
Taassuma aalajangiussimallugu oqaatigaa, brintimut e-fuelsimullu sanilliullugit aluminiummi uninngasuutigissallugu assartussallugulu pitsaanerpaasoq.
- Brinti e-fuelsilu iluanaarutaangaarnavianngillat, taakkumi suliffissanik amerlanerusunik akileraarutitigullu isertitassanik amerlanerusumik pilersitsinavianngillat, tassa aluminiliorfissamik pilersitsiniarnitsinnut sanilliullugit.
Suliffeqarfiup Alcoap ukiorpassuarni aluminiumik aatsitsiviliornissaq pilersaarutigisimavaa. Pilersaarutilli 2016-imi taamaatiinnarneqarsimapput.