Svane: Peqqinnissaqarfimmut tunngatillugu nunanit allanit pilertortumik sulisussarsiorsinnaanermik aaqqissuussineq naammassineqangajalerpoq
Nunanit allanit pilertortumik sulisussarsiorsinnaanermik aaqqissuussineq naammassineqangajalerpoq. Aaqqissuussaq peqqinnissaqarfimmut immikkut tunngatitaq naammassineqariarpat aallartinneqassaaq, naalakkersuisoq Jess Svane ilisimatitsivoq
Folketingimi ilaasortap Aaja Chemnitz Larsenip (IA) inuussutissarsiornermut naalakkersuisoq Jess Svane, nunatsinni nunanit allanit pilertortumik sulisussarsiorsinnaanermik aaqqissuussinermik kinguarsaaneralugu isornartorsiorsimavaa.
Jess Svane tusagassiorfinnut nalunaaruteqarluni isornartorsiuinermut akissuteqarpoq, oqaatigalugulu aaqqissuussinermik kinguaattoornermut coronap ajornartorsiortitsineranit aporfeqarsimaneq pissutaasoq.
Jess Svanep ilanngullugu ilisimatitsissutigaa, suliniutip ingerlateqqinneqarnissaa maanna ulapputigineqartoq:
- Peqqinnissaqarfimmut fast-trackimik isumaqatigiissutissamut allaqqaakkamik piareersaatitut suliuniutinik – aallarniutigisatut – ulapputeqarluarnerput ilisimatitsissutigissavara, maannakkorpiarlu taassuma piviusunngortinnissaa sioqqullugu illua’tungerisat tamarmik akuersissuteqarnissaat utaqqivarput, Jess Svane allappoq.
Sulisussanik pissarsiniartut amerliartortut
Svane naapertorlugu suliffeqarfimmi suliaqarfigisat sinnerinik tamatigoortumik isumaqatigiissutissaq pillugu illua’tungerisallu isumaqatiginninniartoqaleruttorpoq.
Aaja Chemnitz Larsenip isornartorsiuinermini innersuussutigaa, nunanit tamalaanit sulisussarsisinnaaneq unammissutaanerulersimasoq, taamalu unamminermut Kalaallit Nunaat pilertortumik peqataalinngippat tamanna tamatsinnut akisunaarsinnaarneqassasoq.
Jess Svanep erseqqissaatigaa, aaqqissuussaq inissinniarlugu tamaviaarluni sulisoqartoq, pingaaruteqarnerarpaalu suliap peqqissaarullugu suliarineqarnissaa:
- Inuiaqatigiinni annertuunik pingaarutilinnik pissutsinik illua’tungeriit arlallit akornanni isumaqatiginninniarnerni aaqqiissutip piareersarluarlugulu uppernarsaasersorluakkamik tunngaveqartumik piviusunngortinnissaa qulakkeerniarlugu isumaqatiginninnerup angunissaa pingaartuuvoq, Jess Svane allappoq.