Svane: Nukissiorfiit piginneqatigiiffinngortinneqarsinnaavoq
Qeqertarsuup Tunuani erngup nukiganik nukissiorfiliornissap pisariaqartumik aningaasalerneqarnissaa anguniarlugu Nukissiorfiit piginneqatigiiffinngortinneqarsinnaavoq. Jess Svane tusagassiortunik katersortitsinermini taama ilisimatitsivoq.
Qasigiannguit Aasiaallu erngup nukiganik nukissiorfeqalernissaanut aningaasaliinissamut periarfissat arfiniliusut, Inuussutissarsiornermut, Nukissiuteqarnermut Ilisimatusarnermullu Naalakkersuisoq Jess Svane marlunngornermi ilisimatitsivoq.
Erngup nukiganik nukissiorfik Qasigiannguit kujataata kangianiissaaq, illoqarfinnullu marlunnut attavilerneqassalluni, tassa Qasigiannguanut aamma Aasiannut.
Aningaasalersuinissamut periarfissat inuussutissarsiornermut ataatsimiititaliami maanna suliarineqarput, Naalakkersuisullu naatsorsuutigaat Ukiakkut ataatsimiinnermi 2020-mi siunnersuuteqassallutik.
Aningaasalersuinissamut periarfissat
Aningaasaliinissamut periarfissat arfinillit aajuku:
Aningaasanut inatsimmi sanaartornissamut missingersuutini pingaarnersiukkat allanngortinneri
Periarfissaq siulleq, tassunga ilanngullugu nunatta karsiata attartornissaa erngup nukiganik iluaquteqarluni nukissiorfiliornissamut aningaasalersuisussamik.
Nukissiuutinut akitsuummik immikkut siunertamut atorneqartussamut katersineq. Tamanna immikkut inatsimmik tunngaveqartariaqarpoq.
Nukissiorfiit ingerlatseqatigiiffinngortillugit nammineq attartornikkut suliniutinik aningaasaliisinnaanngorlugu. Tamatumani pisariaqarpoq inatsisitigut tunngavissaliinissaq, aamma nukissiuuteqarnermut imermillu pilersuinermut inatsisinik naleqqussaanissaq.
Erngup nukiganik atorluni nukissiorfiit immikkut aktianik piginneqatigiiffinngortinneqarsinnaanerat. Tamatumani pisariaqassaaq inatsisitigut tunngaviliinissaq, aamma nukissiuuteqarnermut imermillu pilersuinermut inatsisinik naleqqussaanissaq.
BOT-mik aaqqissuussineq, tassa avataanit aningaasaliineq. Avataanit aningaasalersuisinnaasumik isumaqatigiissusiornissaq pisariaqassaaq, tunngavissanillu pilersitsoqartariaqarluni.
Amigartooruteqarfiusussaq
Qasigiannguit Aasiaallu erngup nukiganik nukissiorfimmut attaveqalerpata, tamanna inuiaqatigiinnut ukiuni 22-ni tullerni 217 milliuunit koruuninik aningaasartuutaassaaq. Nuummili erngup nukiganik nukissiorfiup allilerneqarnera inuiaqatigiinnut 465 milliuunit koruuninik iluanaaruteqarfiussalluni, immikkut maluginiaqquneqarpoq.
Nukissiuutit piujuaannartitsisunit aallaaveqartut atorlugit nuna tamakkerlugu pisortat pigisaanni 2030-mi pilersuilersimanissaq, Naalakkersuisut siunniunnikuuaat.
- Ukiut qulit sinnilaarlugit qaangiuppata anguniagassaq angusimassagipput piviusorsiortutut suli isigaara. Erngup nukiganik nukissiorfik Qasigiannguanut Aasiannullu attavilerneqartussaq naammassippat, piujuaannartitsinermik aallaaveqartumit nukissiuutit 90 procentinngorsimassapput, Jess Svane oqarpoq.