Svane Kammeradvokatimit sakkortuumik isornartorsiorneqartoq

Soraarnerussutisiassanut ileqqaartussaanermik suliaqarsimaneq pillugu Inuussutissarsiornermut Aningaasaqarnermullu Naalakkersuisoqarfiit akerleriinnerat, eqqartuussissuserisut marluk misissuisimanerannit naggaserneqanngilaq. Eqqartuussissuserisup allap isertortumik misissuisimanerata takutippaa, Inuussutissarsiornermut Naalakkersuisoq Jess Svane sakkortuumik isornartorsiorneqarsimasoq.

Eqqartuussissuserisup allap misissuisimanermini, Sermitsiaq-AG-mit takuneqarsimasumi, arlalitsigit erseqqissaatigaa, Jess Svane Naalakkersuisut suleriaasiannut akerliusumik iliuuseqarsimasoq, soraarnerussutisiassanut ileqqaartussaaneq pillugu eqqartuussissuserisumut misissuititsinissamik inniminniigami.

Naalakkersuisoqarfiit taakku marluk akerleriinnerat paasisaqarfigissagaanni, januaarip qaammataanut utertariaqarpugut, tassani soraarnerussutisiassanut ileqqaartussaaneq pillugu suliaq politikkikkut annertuumik oqallisaavoq.

Inuussutissarsiornermut Naalakkersuisup Jess Svanep tassunga atatillugu eqqartuussissuserisoqarfik DLA Piber naliliisissimavaa, tassani eqqartuussissuserisoq naliliisimavoq, Akileraartarnermut Aqutsisoqarfik inatsimmut akerliusumik iliuuseqarsimasoq.

Naalakkersuisoqarfik akulerussinnaagami?

Nalunaarusiaq Aningaasaqarnermut Naalakkersuisup Vittus Qujaukitsup aatsaavissuaq siullermeersumik ammasumik siunersiueqatigineqarnissaanut nalunaaquttap akunnialui sioqqullugit naalakkersuisumut tunniunneqarsimavoq, naalakkersuisorlu allakkiamik tunniusserisunnginnami illuatungiliuttunit isornartorsiorneqangaatsiarluni.

Aningaasaqarnermut Naalakkersuisoqarfiup isornartorsiorneqarami Kammeradvokati naliliisissimavaa, taanna akerliusumik inerniliisimavoa - tassalu Akileraartarnermut Aqutsisoqarfik inatsit malillugu aqutsisimasoq.

Maannalu paasinarsivoq, Aningaasaqarnermut Naalakkersuisoqarfik allakkiamik allarluinnarmik inniminniisoqarnissaanik aalajangersimasoq, tassani paaserusunneqarsimavoq Inuussutissarsiornermut Naalakkersuisoqarfik suliamut akuliussinnaatitaanersoq.

Aningaasaqarnermut Naalakkersuisoqarfimmut naammagittaalliortussaaneq

Kammeradvokatimi eqqartuussissuserisoq Karsten Hagel-Sørensen tassani allakkiorsimavoq, ilaatigullu imatut inerniliisimalluni:

Inuussutissarsiornermut Naalakkersuisoqarfiup, innuttaasut soraarnerussutisiassanut ileqqaartussaaneq pillugu naammagittaalliortut, Aningaasaqarnermut Naalakkersuisoqarfimmut innersuussimasariaqaraluarpai.

Inuussutissarsiornermut Naalakkersuisoqarfiup aamma soraarnerussutisiassanut ileqqaartussaaneq pillugu malittarisassanik Akileraartarnermut Aqutsisoqarfiup aqutsineranik eqqartuussissuserisut DLA Piber naliliisissimasussaanngikkaluarpai.

Karsten Hagel-Sørensenip tamatumunnga ilaatigut tunngavilersuutigaa, Akileraartarnermut Aqutsisoqarfiup aqutsineranut tunngatillugu naammagittaalliorfissaq tassaasoq Aningaasaqarnermut Naalakkersuisoqarfik.

Eqqartuussissuserisullu ilanngullugu apeqquserpaa, Inuussutissarsiornermut Naalakkersuisoqarfik DLA Piberip misissuisimaneranut akissaqarsimanersoq:

Suleqatigiittussaanermut akerliusumik iliuuseqarsimaneq

- Inatsisilerituumik oqaaseqaqqusineq sooruna aningaasartuutitaqassaaq, Inuussutissarsiornermut Naalakkersuisoqarfiup akilernissaanut inatsisitigut tunngavissaqarfiginngisaanik, eqqartuussissuserisoq Karsten Hagel-Sørensen naliliinermini allappoq.

Eqqartuussissuserisoq naliliinerminik naggasilluni isornartorsiueqqippoq, tassani innersuussutigaa Inuussutissarsiornermut Naalakkersuisup DLA Piperimik misissuisitsinnginnermini, ajornartorsiut pillugu Naalakkersuisut allat oqaloqatigeqqarsimasariaqaraluarai.

Svanep misissuisoqarnissaanik inniminniisimanera, Naalakkersuisut suleqatigiinnissamut tunngaviusumik pisussaaffeqarnerannut akerliusoq, Kammeradvokatip oqaaseqaataani takuneqarsinnaavoq.