Susassaqartut unammilligassaqarput: Kinguaassiutitigut atornerlunneqarsimasut katsorsarneqarnissaannut ilisimasaqanngippallaarneq

Tasiilami inuttaasut amerlassusaat aallaavigalugit kinguaassiutitigut atornerlunneqarsimasut pillugit ukiumut nalunaaruteqartartut nunatsinni amerlanerpaapput. Susassaqartutulli suliaqartut meeqqanik inuusuttunillu kinguaassiutitigut atornerlunneqarsimasut katsorsarnissaannut ilisimasanik amigaateqarlutik oqariartorput.

Tasiilami meeqqat inuusuttullu kinguaassiutitigut atornerlunneqarsimasut pillugit suliassat 56-it politiinut nalunaarutigineqarput. Ukiup siuliani 43-it nalunaarutigineqarput.

Susassaqartut, meeqqat inuusuttullu kinguaassiutitigut atornerlunneqarsimasut pillugit suliaqartartut politiinit apersorneqarnerminni ilisimatitsipput meeqqat inuusuttullu katsorsarnissaannut ilisimasatik naammaginagit.

Kalaallit Nunaata Politiivisa nalunaarutiminni tikkuarpaat susassaqartut meeeqqanik inuusuttunillu sullitaqartut pikkorissarnissaat supervisionertalernissaallu pisariaqarluinnartoq, taamaatuttaaq angajoqqaat pisinnaanerat akisussaaffiallu siusinnerusukkut ukkanneqartariaqartut.

- Angajoqqaat susassaqartullu meeraanerminni kinguaassiutitigut atornerlunneqarsimasut pillugit immikkut ajornartorsiuteqarpoq. Nalunaarusiap “Unge i Grønland – med fokus på seksualitet og seksuelle overgreb” (2015) nassuiarpaa sullissisut akornanni ilisimaneqarluartoq sullissisut meeraanerminni kinguaassiutitigut atornerlunneqarsimagaangamik, meeqqat inuusuttullu kinguaassiutitigut atornerlunneqarsimasut arajutsingajunnerugaat.

Angajoqqaarpassuit nalorsarput

Meeqqat kinguaassiutitigut atornerlunneqarsimatillugit pisimasut eqqartornissaannut angajoqqaat aamma nalorsartarput.

Nalunaarusiami ”Tasiilaq – meeqqanut inuusuttunullu 2014-ip 2018-illu akornanni kinguaassiutitigut atornerluisoqarsimaneranut tunngatillugu sulianik qulaajaaneq”-mi Kalaallit Nunaata Politiivisa susassaqartut Tasiilami meeqqanik inuusuttunillu sullissisut apersorsimavai. Politiit, inunnik isumaginnittut, ilinniartitsisut peqqinnissaqarfimmilu sulisut apersorneqarsimasunut ilaapput.

Nalunaarusiaq naapertorlugu angajoqqaarpassuit meeraanerminni kinguaassiutitigut atornerlunneqarsimasarput. Tasiilami unammilligassat ilagaat suliffissaaleqineq, pissaaleqineq, imigassamik allanillu atornerluineq ilinniarsimanerullu appasinnerunera, taakkulu ilanngullugit angajoqqaanut nukissaaleqisunut unammillernartuupput.

Aammali angajoqqaaqarpoq killiliinermik ilisimaarinnilluartunik. Nalunaarusiap suliarinerani susassaqartut politiinit oqaloqatigineqartut ilisimatitsipput angajoqqaat nukissaqarluartut ilisimatitsisartut meeqqatik kinguaassiutitigut atornerlunneqannginnissaat anguniarlugu allani tukkutitsineq ajortut.

Killit pillugit ilisimasat amerlanngitsut

Kalaallit Nunaata Politiivi isumaqarput meeqqat atuarfiini atuartunut tamanut killiliisarneq pillugut ilinniusiortoqartariaqartoq. Meerarpassuit kinguaassiutit pillugit killiliisinnaanermik ilisimasaqanngillat, allaallu angajoqqaat inersimasullu allat kinguaassiutinut tunngatillugu meeqqanut ileqquliutiinnakkanik pissusilersortarlutik. Assersuutigalugu meeqqat akornanni, aamma inersimasut meeqqallu akornanni, naliginnaatinneqarpoq qeerleraanneq, imaluunniit angajoqqaat paarsisulluunniit allat meeqqat innartinnerisa nalaanni akulaavisigut kinguaassiuutaatigulluunniit attuuannittarnerat naliginnaatinneqarluni, susassaqartut politiinut ilisimatitsipput.

- Meeqqanut inuusuttunnullu ilaannut ’naliginnaasuusimavoq’ inersimasut kinguaassiutitigut atoqatigiittarnerannut assigusinnaasunut ilaaginnarnissaq. Aatsaat Tasiilap illoqarfianut nuukkunik, nuussagunilluunniit, illoqarfimmilu kollegiani najugaqalerlutik inuusuttoqatiminnut oqaluttuaraangamik paasisarpaat iliuutsit tamakku akuerineqarsinnaanngitsuusut, nalunaarusiami allassimavoq.

Kalaallit Nunaata Politiivisa nalunaarusiaminni qulaajaanerminni inerniliussaraat Tasiilami meeqqat inuusuttullu kinguaassiutitigut atornerlunneqarsimasut nalunaarutigineqarsimasuni 191-ini 60-it nunaqarfinni tallimaasuni pisimasartut. Nunaqarfimmiit nunaqarfimmut nalunaaruteqartarnerit kisitsisitigut assigiinngisitaaraluartut, taamaattoq nalunaarutit ukiuni tallimani kingullerni tunniunneqarsimasut pingajorarterutai Tasiilap nunaqarfiineersuusarput.

Powered by Labrador CMS