Sunngiffimmi piniareernermi pisanik nalunaartut amerlanngitsut

Sunngiffimmi tuttunik umimmannillu piniarnermut allagartat 2016-imi maajip aallaqqaataatinnagu akilerneqassasoq, aalisarnermut piniarnermullu naalakkersuisoqarfiup eqqaamaqquaa.

Taamaanngippat 2016-imi aasakkut ukiakkullu tuttunniarnissamut umimmanniarnissamullu akuersissutinik tunineqarsinnaassanngillat.

Killigititaq eqqaamajuk
Piniarfinni amerlanerpaani ukiuni arlaqartuni tuttunik umimmannillu kisitsisoqarnikuunngilaq, tamannalu pillugu biologinit siunnersuuteqartoqanngilaq.

Tamanna pillugu 1. maajimi kingusinnerusukkulluunniit sunngiffimmi piniarnermut allagartamut akiliisimasut 2016-imi pissarsisinnaanngillat.

Atuaruk: Umimmaat kisinnissaannut ikiortissarsiorpoq

Uumasulli amerlassusaasa ilisimaneqannginnera kisimiinngilaq.

Naalakkersuisoqarfiup aamma paasisimavaa tuttunniarnissamut umimmanniarnissamullu akuersissutit tunniunneqartartut pingajorarterutaat inorlugu utertinneqartartut.

Amerlanngitsut nalunaartartut
- Akuersissutit pisanillu nalunaaruteqarneq piniarnerup naammassineqarnerata kingornatigut kingusinnerpaamik sapaatip akunnerisa marluk qaanngiunnerani utertinneqartussaapput, tamannalu pisaqarsimanngikkaluarluniluunniit aamma atuuppoq, Namminersorlutik Oqartussat allapput.

- Akuersissutit iluamik utertinneqartannginnerat pissutigalugu tuttoqatigiit umimmaqatigiillu qanoq innerat nalileruminaappoq.

Atuaruk: Unammisitsinermi Kalaallit Nunaanni Tuttu Kusanarnerpaami ajugaasoq