Sungiusaasoq: Finalimut anngunnissaq tamaviaarutigissavarput

Arnat assammik arsartartunut nunanut allanut unammisartut, pisariaqartitaminnik ullormik qasuersaarfeqareerlutik, Puerto Ricomut semifinalernissaminnut piareersimapput. Nunanut allanut unammisartunut sungiusaasoq, Johannes Groth taama ilisimatitsivoq.

Kalaallit arnat assammik arsartartut nunarsuarmi pissartanngorniunnermut anngunniunnermi semifinalimut anngutereernermi kingorna, ippassaq tallimanngornermi pisariaqartitaminnik ullormik qasuersaarfeqarput. Ulloq qasuersaarfigisartik olympiadimi unammisarfimmit nikilaarlutik atorpaat. Sungiusaasoq taama ilisimatitsivoq.

- Ippassaq pisariaqartitatsinnik ullormik qasuersaarfeqarpugut. Maani illumit matoqqasumit nikilaarnissarput pisariaqartissimavarput, eqqarsaatit allamut saatilaarlugit, maanilu olympiadimi unammisarfimmi nerisartakkatsinnit allaanerusunik nerisaqalaarluta. Taamaattumik Mexico Cityp qeqqabyjarpugut, ullorlu nuannersumik atorlugu, nunanut allanut unammisartut sungiusaasuat, Johannes Groth, Sermitsiaq,AG-mut taama oqaluttuarpoq.

Piareersarnerit

Ulloq qasuersaarfiusoq aamma arfininngornermi Puerto Ricomut semifinalernissamut piareersarnermut atorneqarpoq.

- Piareersarnerit ippassaq aallartippagut, siullermik oqaloqatigiilluta – tamatumalu kingorna unammisassagut videokkut isiginnaarpagut. Unammisartut pikkorissortaqarput, taakku sukkassusermik pitsaassutsimillu aqutsipput, sungiusaasoq oqarpoq.

Suliassaq ajornartuunngitsoq

- Amerlanerusunik arsartoqarpugut, tassuunalu eqqorniarsarissavagut. Suliassaq ajornartuunngilaq, taamaattumik finalernissaq tamaviaarutigissavarput, Johannes Groth oqarpoq, arsartut tamarmik ajoquteqanngitsut taassuma ilisimatitsissutigaa.

Kalaallit Nunaata aamma Puerto Ricop akornanni unammineq nunatsinni nalunaaqutaq malillugu unnugu 19.00 aallartissaaq.

Powered by Labrador CMS