Sungiusaasoq tipaatsuttoq: Isumaqatigiissut periarfissarpassuarnik pilersitsivoq

Marlunngornermi Sermitsiaq.AG-p allaaserisaqarneratut, Kalaallit Nunaanni Arsaattartut Kattuffiat aamma Dansk Boldspil-Union suleqatigiinnissamik isumaqatigiissummik atsiorput.

Isumaqatigiissutip qulakkiissavaa Kalaallit Nunaanni arsartarneq pitsanngorsarneqarnissaa, amerlanernik arsartartoqalernissaa aamma dommereqalernissaa, pitsaanernillu sungiusaasoqalernissaa.

Pilersaarutaavorlu ivigaasanik arsaaffinnik angisuunik sisamanik arfinilinnilluunniit illoqarfinni assigiinngitsuni peqalernissaa.

Sungiusaasuulluni nuannernerulertoq
Angutit nunanut allanut unammisartut sungiusaasuat Tekle Ghebrelul, Kalaallit Nunaanni arsarnerup tungaatigut iluaqutaasussamik DBU-mik isumaqateqartoqarnera assut nuannaarutigaa.

- Taamaaliornikkut DBU akisussaaffimmik tigusivoq, isumaqatigiissullu arlalitsigut pitsaavoq, periarfissarpassuarnillu pilersitsilluni. Maannakkuminngaanniik sioqqani arsaanneq qimakkiartussavarput, sungiusaasoq oqarpoq, siunissamilu nunatsinni pissartanngorniunneq sioqqani ingerlattarunnaarneqassasut oqaatigalugu.

Atuaruk: Isikkammik arsaanneq annertusiniarlugu suleqatigiinnermut isumaqatigiissut

Qularinngilaalu timersorneq kivinneqassasoq.

- Maanna sungiusaasuulluni nuannernerulerpoq, tassami sungiusaasunik ilinniartitsisoqassammat. Arsaattartut sivikitsuinnarmik sungiusarneqartarnerat tamaanga killeqassaaq, tassamik ukioq naallugu sungiusaasoqarnissaq pingaaruteqarpoq, Tekle Ghebrelul erseqqissaavoq, neriuutigaalu Kalaallit Nunaat Island Gamesimi peqataasarunnaarlutik, nunat tamalaat arsartartut kattuffiinut ilaasortanngussasut.

- DBU-p aamma GBU-p akornanni qanimut suleqatigiittoqarnissaa assut neriuutigaara, tassami nunatta timersornerup siunissaanut alloriarnerujussuussagami, sungiusaasoq oqarpoq.

Unamminerit amerlanerusut
Piffissami aggersumi futsalimi nunanut allanut unammisartut unammisaqattaassapput. Unammisartut sisamanngorpat tulliani Danmarkimut aallassapput, pingarsoriarlutik sisamariarlutilluunniit unammiartorlutik, Danmarkimilu futsalimi nunanut allanut unammisartut kalaallit unammisartuinut unammiarlutik novemberimi Nuummukassapput.