Sungiusaasoq aallarpoq: Svenskit futsalertartut klubbianni sungiusaasunngortoq
B-67 13-ssaa arsaalluni pissartanngortereerlugu Tekle Ghebrelul ataasinngormat Nunatsinnit aallarpoq. Finlandimi sungiusaasutut pikkorissareeruni Sverigemi sungiusaasunngussaaq. - Kisianni Kalaallit Nunaannut uteqqissaqqaarpunga, oqarpoq
Arsaannermi pissartanngortut B-67 timersoqatigiiffimmi Tekle Ghebrelul sungiusaasuujunnaarpoq Sverigemullu nuulluni.
Sverigemi klubbimi Örebro-mi futsalertartui sungiusaasuuffigissavai kiisalu silami arsaartartunut sungiusaasunut ilaassalluni.
- B-67 qimassallugu imaannaanngilaq, nutaamilli misiliinissaq piffissanngorpoq. Sverigemiippunga aasaq, tassani takusakka pitsaasuupput, aalajangerpungalu Örebromi sungiusaasunngussallunga. Aalajangernera B-67-mut aamma pitsaassaaq, nutaamimmi aamma sungiusaasoqalernissamut periarfissaqalerpoq nutaanik misileraasinnaasumik, oqarpoq.
Ukiut qulit iluini arfineq pingasoriaq pissartanngortoq
Tekle Ghebrelul B-67-mi 2009-mi sungiusaasunngorpoq, tassani sungiusaasuunerani B-67 quleriarluni pissartanngorniutivinnerni unammivoq, arfineq pingasoriaq pissartanngorlutik.
- Nutaamik misileerusuppunga, aamma piginnaasakka misilittarusuppakka. Aamma sungiusaasutut ineriartornissara pingaartippara, imaassinnaasormi klubbimi pitsaanerusumi sungiusaasunngoriasaartunga. Sverigemut nuunnginninni Finlandiliaqqaassaanga, tassani Uefap ataani sungiusaasutut pikkorissassallunga, tamanna siornatigut periarfissarisimannginnakku misilissallugu qilanaaraana, Tekle Ghebrelul oqarpoq.
- Kalaallit Nunaaniinnera nuannarisorujussuuara, akuerineqartutummi misigisimavunga. Ilaqutakka Nuummiiginnassapput, tikeraartarumaarpakkalu. Kalaallit Nunaat qimavillugu oqarusunngilanga, tassami uteqqikkumaarpunga, oqarpoq.
Sungiusaasuunermi misigisat
Arsaannerup tungaatigut ineriartortitsilluarsimalluni misigaaq.
- B-67-mi ataatsimoorluta pitsanngorsaanissaq anguniarlugu sulinikooqaagut, akuusinnaanera nuannaarutigaara. Tassani piumassuseq aamma peqqissuunissaq pingaartitaraarput. Soorunami nuanninngitsunik pisoqartarnikuuvoq, soorlu ukioq kingulleq ammip qalipaataanik tunngavigalugu nikanarsaasoqarpoq, taamaattorli pisut nuannersut eqqaamasaqarfigilluarneruakka, oqaluttuarpoq.
Tekle Ghebrelul 2017-mi nunanut allanut unammisartunut sungiusaasutut soraarsitaavoq. Marloriarluni Island Gamesimi silvinnatitseqataavoq sungiusaasuunermini.
- Arsaannermi eqqaamasanni suna nuannernersaava?
- Misigisat nuannersorpassuit arlaqarput, kisianni Ilulissani 2012-mi Nagdlunguamut pissartanngorniunitsinni 3-2-mik ajugaanerput nuannernerpaatut eqqaamavara. Kisianni taakkartorsinnaasakka puigunaatsut arlaqarput, Tekle Ghebrelul oqarpoq.