Skip to main content

Sundholm: Toqqissisimasumik nakkaaffik

Kalaallit inuusuttut Københavnimi Sundholmimukarsimatillutik sakkortuumik atornerluisoqarfimmi inuuneqalersarput. Taamaakkaluartoq sumiiffik amerlasuunit toqqissisimanartutut oqaatigineqarpoq.

Sundholmi Københavnimi Amagerimi illoqarfiup ilamininnguatut ippoq. Illoqarfimmi sumiginnangaanerpaat tassaniittarput. Taakku tassaapput ineqanngitsut, annertuumik atornerluinermik ajornartorsiutillik aammalu tarnimikkut ajoqusersimasut.

Sumiiffimmilu pissutsit sakkortunerat sulisunit oqaluttuarineqarpoq. Sumiiffimmi aanngajaarniutinik atornerluineq amerlasuunit ulluinnarsiutigineqarpoq. Tassaniippullu kalaallit inuusuttut utoqqasaajunerusullu sumiginnakkat.

- Tamaani Sundholmimi kalaallit amerlasuujunerat pissutigalugu ilaasa tamaannassutigisarpaat, Jeanette Madsen Natcafémi isumaginninnermik sullissisoq oqarpoq.

Natcafé unnuiffigineqarsinnaasumik neqerooruteqarsinnaavoq. Neriniartarfimmi nerisassanik pisisoqarsinnaavoq. Silataani amerlanngitsunik issiaveqarpoq silagitsillugu kalaallit ataatsimoorfigisagaannik.

Natcafép ungasinngisaaniippoq Herbergscentret, tassani piffissami sivisunerulaami inissittoqarsinnaavoq.

Toqqaannaq Sundholmimut

Sumiiffilli akunnittarfiunngikkaluartoq kalaallit inuusuttut Danmarkimut tikiinnarlutik unnuiffigisarpaat.

Københavnimi inuusuttunik sumiginnakkanik misissuineq

Kalaallit Illuat inuusuttut Københavnimi sumiginnakkat pillugit misissuisimavoq.

- Sulisut aamma kattuffiit naalakkersuinermut attuumassuteqanngitsut, sumiginnakkanik apersuinerannik misissuineq ingerlanneqarpoq.

- Inuusuttut 43-rut 18-nit 30-llu akornanni ukiullit apeqqutinik akissuteqarput. Misissuineq qallunaatut ingerlanneqartariaqarsimanera pissutigalugu kalaallisut oqaasillit ilaat akissuteqarsinnaasimanngillat.

- Misissuinerup ilaatigut takutippaa inuusuttut amerlasuut Danmarkimut tikinnerminniit toqqaannartumik atornerluisoqarfimmut pisarnerat.

- Affaasa angajoqqaaminni peroriartorsimannginnertik oqaluttuaraat. Taakku ilaquttaminni allamiluunniit peroriartorsimapput.

- Misissuinermi 20-t 23-llu akornanni ukiullit 67 procentii ukiuni pingasuni sivisunerusumilluunniit Danmarkimiissimapput, taamaasillutik inuusunneroqalutik sivisuumik atornerluisimallutik.

- Aanngajaarniutinik atuinerat Danmarkimut tikinneranniit annertuseriangaatsiarsimavoq.

- Ilinniagaqarnissamik kissaateqarneq amerlasuunit aallarsimanermut tunngavilersuutigineqartarpoq. Taassuma saniatigut nutaamik aallartitsinissaq neriuutitut taaneqarpoq aammalu ilaqutariinnermi pissutsit, aappariikkunnaarsimaneq, inissaaleqineq, assersuutigaluguluunniit kinguaassiutitigut atornerlugaasimanermik qimarratiginninneq.

- Pingajorarterutaat sinnerlugit isertitaqanngitsuupput taamaasillutik pilersuinissamut tunngavissaqaratik. Isertitaqanngitsututut inissisimasuni affaat sinnerlugit ukioq ataaseq sinnerlugu Danmarkimiissimasuupput.

- Inuusuttut pingajorarterutaat Danmarkimi Chrisiatianiami imaluunniit Sundholmimi unnuk siulleq unnuisimapput. Taakkua affaat unnuk siulleq ilisarisimasaminni unnuisimapput.

- Ilaqutariit Kalaallit Nunaaninngaanneersut sumiiffissaqannginnertik pissutigalugu tamaannartarnerat takusarsimavarput. Taakkua Sundholmi pillugu oqaluttuarsiarisimanera pissutigalugu ornittarpaat. Oqaluttuarinnittulli tamaani pissutsit qanoq sakkortutiginerat erseqqissumik oqaluttuarisimaneq ajorpasippaat, Henrik Bolling Natcafémi aqutsisoq  oqaluttuarpoq.

Aallaqqaammut ilaat ilisarisimasaminni unnuisarput. Sundholmimiissinnaavoq.

- Danmarkimukartarput tamaanilu Sundholmimi ilisarisimalersimasaminni  sumiiffinniluunniit allani Københavnimi unnuisarlut. Tamatumalu kingorna nalaasaarfinni unnuisartunngortarlutik, Jeanette Madsen nassuiaavoq.

- Ilisarisimasatik qasutikkaangamikkit immaqalu sumi tamaani sinittarneq qasunarilersimallugu taava tamaannartarput cafémilu unnuillutik.

Eqimattami pissutsit

Tamaanilu unnuiffissamik kissaateqarneq kisiat piinnarlugu inuusuttut tamaannarneq ajorput. Tamaaniinnermi nuannarisarpaat.

- Naak tamaani pissutsit sakkortungaluartut, kalaallit inuusuttut aperingaangatsigit amerlanersaasa Sundholmi toqqissisimanartutut oqaatigisarpaat. Tamaani ataqatigiinnerannik  tamatumunnga pissutaavoq, Henrik Bolling oqarpoq.

Tamaanimi Sundholmimi – ingammik piffissami siullermi – immikkuullarissuuvoq. Taakku ukiuni arlalinni atornerluisuniit peqqinnerullutillu nukittunerusarput. Taakku hierakiimi qaffasinnerusumi inissisinnaapput.

- Tamaani Sundholmimi inuusuttut eqimattami inissisimalluarsinnaapput. Illoqarfimmilu angerlarsimaffeqanngitsutut imerajuttutulli ammut isigineqaannartuullutik, Henrik Bolling nassuiaavoq.

Uterneq

Ajornartorsiut tassaavoq, Sundholmi najugarissallugu peqqinnannginnera. Imigassamik aanngajaarniutinillu atornerluineq inuusuttut sukkasuumik nakkassutigisarpaat. Natcafémiillut inuit sukkanerpaamik ingerlaqqinnissaat anguniarneqartarpoq.

- Inuusuttunut neqerooruteqarneq pissutigalugu inuusuttut ilaat ingerlaannaq ingerlateqqinneqarsinnaasarput. Amerlasuulli ingerlaannaq utertarput, ilisarisimasaammi tamaaniipput, Jeanette Madsen oqarpoq.

Illoqarfimmi allami kiserliorneq tamaanga utertarnermut pissuteqarnerusarpoq.

Inuusuttut tamaani Sundholmimi eqimattamut naleqquttuunngillat. Sulisulli nalunngikkaluarlugu inuusuttut imigassamik, hashimik, kokainimik nakuusernermillu ulluinnarsiuteqartut sapinngisartik tamaat ikiorserniartarpaat.

- Naak ajornakusoortutut isikkoqaraluartoq neriuuteqarfigiuaannarpakka – pitsaanerulernissamik neriuteqarneq uangalu ikiorsinnaallugit, Jeanette Madsen oqarpoq.

- Ilaammi ingerlariaqqittarput, tamanna eqqaamasassaavoq pingaarutilik.

Sammisaq pillugu allaaserisat una toorlugu nassaarisinnaavatit.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER