Sundhedsassistentit sulinermut allannguutinut akuersinngippata soraarsitaasinnaanerannik ilisimatinneqartut

Peqqissaasut arlaqartut Sundhedsassistentit peqatigiiffiannut, SP-mut, piffissami kingullermi saaffiginnissimapput, atorfimmut tunngatillugu malunnaatilimmik allannguisoqarnissaanut tunngatillugu tusarniummik tunineqareernermik kingorna. Atorfimmi allannguutinut tunngatillugu akuersaanngippata, sulisitsisup soraarsitsinissaq periarfissaraa.

Unnuarsiortalernissat akueriuk, taamaanngippat suliunnaarsinnaavutit.

Sundhedsassistentit peqqinnissaqarfimmi sulisitsisuminnit taama ilisimatinneqarsimapput. Taamalu ilisimatinneqareernerminnit Sundhedsassistentit Peqatigiiffiannut, SP-mut saaffiginnissimallutik.

- Ilaasortatsinnit arlalinnit pingaartumik piffissami kingullermi, atorfimmut tunngatillugu allannguuteqartoqalerneranik ilisimatinneqarsimasunit saaffigineqarpugut. Allannguutit akuerinngippatikkit soraarsinneqarsinnaasut ilisimatinneqarsimapput. Soraarsitsinermut tamanna tunngavissaanngilaq, SP-mi siulittaasoq, Dorthe Ludvigsen Sermitsiaq.AG-mut oqaluttuarpoq.

Soraarsitsinermut tunngavissaanngilaq

Sermitsiaq.AG-p Sanami sulisumut tusarniutigineqartut pillugit allakkiaq tigummivaa. Tusarniutigineqartutut allassimavoq sundhedsassistenti, Tina Jakobsen, 65-inik ukiulik, atorfimminut tunngatillugu malunnaatilimmik allannguisoqarnissaanik akuersinissamik atsioqquneqartoq. Atsiunngippat, taamatullu allannguutissat akuerinngippagit, sulisitsisup soraarsitsinissani aalajangersinnaavaa.

Tina Jakobsen marluinnik oqaaseqarpoq, peqqinnissaqarfimmi ukiuni 36-ini sulisimavoq, nunatsinnilu sundhedassistentitut ilinniagaqartuulluni. Sanami uninngavimmi maanna atorfeqarpoq.

Atsiugassaq 15. apriliutinnagu atsiunngippagu soraarsinneqarsinnaanera ilisimatitsissutigineqarsimavoq. Atsiorsimanngilaq, 31. decemberimilu naggammik sulisussatut nalunaarfigineqarluni soraartussanngortinneqarsimavoq.

- Taama inissisimalluni nuanninngilaq. Sulisitsisunnut piffissami sivitsortumi isumaqatigiissuteqarnikuuvunga unnuarsiussanngitsunga peqqissuunissara pillugu. Atorfimmut tunngatillugu allannguutit akuerissagukkit uannut peqqinnarnavianngilaq, Tina Jakobsen Sermitsiaq.AG-mut oqaluttuarpoq.

Tina Jakobsen oqaluttuarpoq aami qaffasittarnera pissutigalugu piffissami sivitsortumi unnuarsiortarsimanani.

Peqatigiiffik suliniuteqarpoq

Sundhedsassistentit Peqatigiiffiat, SP, ilisimatitsivoq peqqinnissaqarfimmi qullersat maanna oqaloqatigineqartut sundhedassistentit pineqartut seniorordning, tassa ukioqqortunerusunut aaqqiissut, malillugu atorfeqartilernissaat anguniarlugu.

- Maluginiarparput ilaasortat uagutsinnut saaffiginnittut taakkuusut ukioqqortunerusuusut, imaluunniit peqqissutsimikkut akornuteqartuusut. Qullersanit sulisunut taama iliorneq inissaminiinngilluinnarpoq, SP-mi siulittaasoq Dorthe Ludvigsen oqarpoq nangillunilu:

- Sulisut ukiorpassuarni misilittagallit, marluinnik oqaaseqartut uninngasunullu attaveqarluartuusut pineqarput. Napparsimmavimmi uninngasartut amerlanerpaartaat kalaaliupput, kalaallinillu sulisoqarnera toqqissisimanarisarpaat, oqarpoq.

Seniorordning pillugu oqaloqatiginnittut

SP-mi ilaasortat akissarsianut tunngatillugu isumaqatigiissutertik naapertorlugu sulisitsisuminnut isumaqatigiissuteqarsinnaapput seniorordning malillugu atorfeqartinneqarnissamut. Taamaaliorsinnaapput 55-inik ukioqalereersimagunik imaluunniit peqqissutsimikkut akornuteqarunik. Seniorordning atorlugu atorfeqartitsinermi sapaatip akunneranut akunnerit suliffissat ikinnerutinneqarsinnaapput, imaluunniit unnukkoornerit unnuarsiornerilluunniit atorneqarunnaarsinnaallutik. Isumaqatigiissulli tamanna Tina Jakobsenimut atuutsinneqanngilaq.

Dorthe Ludvigsen ilisimatitsivoq ilaasortat sinnerlugit seniorordningeqartitsinissaq peqqinnissaqarfimmi qullersanut oqaloqatigiissutiginiarneqartoq.

- Ilaasortagut suliffimminni suli tunniussassaqarluarput. Seniorordning atorneqarsinnaappat suliffeqarfik sulisussaaleqiuartoq sulisussanik qulakkeerneqarsinnaagaluarpoq, SP-mi siulittaasoq Sermitsiaq.AG-mut oqarpoq.

Sermitsiaq.AG peqqinnissaqarfimmi qullersanut saaffiginnippoq sulisunut tunngatillugu seniorordningeqartitsinissamut suliniutit suunersut. Qullersanit akissutisinissaq suli utaqqineqarpoq.

Powered by Labrador CMS