Suna tamarmik killeqartarpoq: Royal Arctic Line Aalborgip umiarsualivianiit kingullerpaamik aallartoq
Royal Arctic Linep umiarsuaataa Aalborgip umiarsualivianiit naggammik aallarpoq. Tamanna malunnartinniarlugu nipilersortoqarlunilu oqalugiartoqarpoq.
Naggammik aallartoqarnissaa kiisami pivoq.
Umiarsuaatileqatigiiffiup Royal Arctic Linep umiarsuaataa ukiuni 50-ini Aalborgip umiarsualivianiit aallartartoq naggammik aallarpoq.
Tamanna pivoq umiarsuaq Tukuma Arctica Line nalunaaqutaq 13.30 Issittup tungaanut ingerlaarniarluni aallarmat.
Aallannginnerani - Ann-Britta A. Osvig Royal Arctic Linemi attaveqartarnermut nittarsaassisarnermullu pisortaq naapertorlug - Aalborgip umiarsualiviata quersuani annikitsumik malunnartitsisoqarpoq.
Tassani ilaatigut tunissuteqartoqarlunilu assigiinngitsunit oqalugiartoqarpoq. Aamma erinarsortartoq Simon Lynge nipilersukkanik arlalinnik tusarnaartitsivoq.
Siunissami angallaffiusartussaq
Royal Arctic Linemit 2017-imili nalunaarutigineqarsimavoq, nunarsuarmi assartuisarfiit sinnerinut pitsaanerusumik attaveqarniarluni umiarsuaatileqatigiiffimmit Århusi tulaffigineqartalerniartoq.
Umiarsualiviit amerlanerusut pitsaanerusumillu atassuteqaatillit - umiarsuaatileqatigiiffik naapertorlugu - sullitat niuernermi periarfissaqartinnerulerlugillu sulissisartutut anginerusunik atuisinnaalissapput.
Royal Arctic Linep Port of Aalborg (Aalborgimi umiarsualiviup annersaanik piginnittoq) peqatigalugu umiarsualiviup aallaaviujunnaartinneqarnissaa piareersarsimavaat.
Royal Arctic Linemit oqaatigineqarpoq, oqaloqatigiinneq ukiorpassuarni suleqatigiissimanermut attuumassuteqarsimasoq, suleqatigiit tamatuma pitsaasumik tigussaasumillu naggaserneqarnissaa kissaatigisimavaat.