Sumiiffiit kulturikkut kingornussassat maanna nunat katersugaasiviinit ilisimatusarfigineqarlertut
Danmarkimi Kalaallit Nunaannilu katersugaasiviit marluk Carlsbergfondemiit 26,5 millioner koruuninik aningaasaliiffigineqarlutik Issittumi sumiiffiit kulturikkut kingornussat marluk ukiuni sisamani ilisimasassarsiorfigissavaat
Aasivissuit-Nipisat aamma Kujataa nunataat immikkuullarissuupput, taakkunani inuit kulturiat qallunaatsiaallu pillugit oqaluttuassarpassuaqarluni, katersugaasiviit tusagassiutinut nalunaarummi paasissutissiipput.
Ilisimatusarneq
- Sumiiffiit 2017-imi 2018-imilu UNESCO-p kulturikkut kingornussassaannut ilanngunneqarput, tassungalu atatillugu sumiiffiit kulturikkut naleqartitat pillugit Danmarks Nationalumuseet aamma Nunatta Katersugaasivia ‘Activating Arctic Heritage’-mik atserlugu ilisimatusarnermik ingerlataqassapput, tusagassiuutinut nalunaarummi allassimavoq.
- Inuiaqatigiit Issittumi peqarneeqisumi ukiorpassuarni qanoq inuuniartarsimanerinik ilisimatusarfigissavarput. Ilisimatusarnikkut periutsit nutaaliaanerpaat atussavagut. Kalaallillu suleqatigut najukkanilu najugaqartut qanimut suleqatigissallugit, Danmarkimi Nationalmuseetimi pisortaaneq Rane Willerslev oqarpoq.
Verdenshistorie
- Maanna sumiiffiit taakku marluk nunarsuup oqaluttuarisaaneranut ilanngutissavagut. Kalaallit Nunaat Issittumi avinngarusimasuujunnaarsissavarput. Killormuanik oqaluttuarisaanerup takutippaa, Inuit arfanniallu europameersut naapinneri tamatigut annertuumik kulturikkut avitseqatigiittoqartartoq. Tamanna ukiuni sisamani tulliuttuni ilisimasaqarfiginerulissavarput, Nationalmuseetiminngaanneersoq dr. phil. Bjarne Grønnow oqarpoq.
Bjarne Grønnow 1978-imi siullerpaamik Aasivissuarmi nunamik assaasoqarnerani peqataasimavoq maannalu ukiut 40-rut qaangiunneranni ilisimatusartut 15-it aqussavai.
Suleqatigiinneq
Nunatta Katersugaasiviani pisortap tulliata Christian Koch Madsenip annertuumik ilisimatusarnissaq pillugu ima oqarpoq:
- Ukiuni qulikkuutaani kingullerni Danmarks Nationalmuseetip Nunattalu Katersugaasivia najukkani katersugaasiviit Kalaallit Nunaannilu Ilisimatusarfik peqatigalugit Kalaallit Nunaata kulturikkut oqaluttuarisaanerata ilisimaneqarnera siammartertarsimavaat. Massakkullu allariaqqissaagut najukkanilu najugallit suleqatigalugit nutaanik ilisimasassarsiussaagut. Taamatut suliniuteqarnermi Kalaallit Nunaanni kulturikkut ilisimasaqarnerulissapput.