nunatsinnit
Sume pillugu takutitassiaq illoqarfinni assigiinngitsuni takutinneqassaaq
Nipilersoqatigiit Sume pillugu piviusulersaarut Nuummi kisimi takutinneqassanngilaq
Sivisuumik suliarineqareerpoq. Suliarineqarnerali naammassingajalerpoq. Maannakkummi killorneqarnera naammassingajalerpoq. Nipilersoqatigiit Sume pillugu piviusulersaarummik sanasut Inuk Silis Høegh aamma Emile Hertling Péronardip nalunaarutigaat piviusulersaarut qaqagu takutinneqassanersoq, piviusulersaarullu 'Sume – mumisitinerup nipaa'-nik ateqartinneqarpoq.
Kulturikkut illorsuarmi nuummiittumi Katuami siullermeerluni septembarip aqqaneq aappaanni takutinneqaqqaassaaq. Tassanngaannit Sisimiuni septembarip 18-ani Ilulissanilu septembarip 21-ani takutinneqassalluni. Piviusulersaarut illoqarfinni assigiinngitsuni takutinneqassaaq. Tamanna kingusinnerusukkut nalunaarutigineqarumaartoq Inuk Silis Høeghip Emile Hertling Péronardillu oqaatigaat.
Nipilersortartut piviusulersaarummi ilaatigut apersorneqarput, 1970-ikkunnili pisut pingaartinneqarnerussallutik.
Nipilersoqatigiit nuannarineqarluartut qangali tusarnaartitsipput, ilisimaneqanngilarlu aamma tusarnaartitseqqissanersut.
- Niumma malugisaataata ajornartorsiutigitillugu tusarnaartitsisoqarallarnavianngilaq. Guitarera maannakkut atorsinnaanngikkallarpara. Tusarnaartitsissagaanni pimoorussisoqartariaqarpoq, pitsaanerulissagumali tusarnaartitseqqinnissamut piariissaanga, Per Berthelsen oqarpoq. Malik Høegh, Hans Fleischer aamma Emil Larsen nipilersoqatigisarpai, 1972-imilu nipilersoqatigiit aallartinneqarput.