piviusulersaarusiaq
Sume pillugu piviusulersaarusiortut: Suliarput nuannaarutigeqaarput
Ilitsersuisoq Inuk Silis Høegh aamma produceri Emile Hertling Péronard suliartik unnugu takuteqqaarneqarnissaanut piareerput
- Piareeqqanerusinnaanngilagut. Isiginnaartunik sanaarput qanoq tiguneqarnersoq soorunami pissangassutigaarput. Suliarput suliarinera sivisuvoq, ilikkagaqarnarluni, Sume-milu nipilersortartut suleqatigineri annertulluni.
Produceri Emile Hertling Péronard Sermitsiaq.AG-mut oqaluttuarpoq.
Sume pillugu piviusulersaarummik sananissaq Inuk Silis Høeghilu maajimi 2010-mi eqqarsaatigilerpaat. Sumekkut tusarnaartitsimmata ukiaanerani filmilioqqaarput.
'Sume - mumisitsinerup nipaa' kulturikkut illorsuarmi Katuami pisortatigoortumik takutinneqaqqaassaaq pingasunngornermi. Qaaqqusat takusinnaassavaat, ilaatigut aamma Sume-mi nipilersortartut ilaassapput.
- Suliatta nalilerluarneqarnera nuannaarutigeqaarput, Emile Hertling Péronard Sermitsiaq.AGmut oqarpoq.
- Suleqatillu Inuk Silis Høeghilu sanaarsi qanoq nalilerpiuk?
- Ukiuni sisamani suliarinikuusaq nalilersussallugu nalunarpoq, kisianni nuannaarutigeqaarput. Rockimik nipilersornermik politikkimillu sammivilimmik suliaqarnermut iluatsippoq, aamma ataqatigiissaagaalluagaavoq.
- Filmip takuteqqaarneqarnissaa qilanaaraarput, tassani Sumep suleqatigineqanut aamma qujassutissaqarpugut, sulinitsinni annertuumik ikiorpaatigut, Emile Hertling Péronard oqarpoq.
'Sume - mumisitsinerup nipaa' qaaqqusanut unnugu pingasunngornermi takutinneqaqqaassaaq.
Filmi inunnit takuneqarsinnaalissaaq tallimanngorpat nalunaaqutaq 21.00-mit.
Filmi Sisimiuni, Ilulissani Københavnimilu aamma takutinneqassaaq. Sisimiuni Ilulissanilu septembarip 18-ani 21-anilu, Københavnimi oktibarip 16-ani.
Atuagagdliutini Sume pillugu allaaserisarpassuaqarpoq. Aviisi ataani pisiarineqarsinnaavoq: