Piviusulersaarut

Sume pillugu filmip takutinneqareernerani: Siunissami eqqaamaneqassaaq

Aleqa Hammondip, Aqqaluk Lyngep Malik Høeghillu nipilersoqatigiit Sume pillugit piviusulersaarut nuannareqaat

Piviusulersaarut takutinneqareermat Sumekkut nipilersortui qaqisinneqarput. Talerpiata tungaaniipput filmimik suliaqartut, Inuk Silis Høegh aamma Emile Hertling Péronard

- Takusara nuannarisorujussuuara, piviusulersaarutip aallakaatinneqarnerani illarpunga, qullilivunga kiisalu inuianni peqataanera tulluusimaarutigalugu.

Naalakkersuisut siulittaasuat Aleqa Hammond, Siumut, kulturikkut illorsuarmi Katuami piviusulersaarut 'Sume - mumisitsinerup nipaa' takoreerlugu pingasunngornermi oqarpoq.

Inuusuttut
Aqqaluk Lyngep piviusulersaarut minutsini 73-ni takissuseqartoq isiginnaareerlugu attortisimaarlunilu eqqarsaatersorpasippoq.

- Filmi takoreerlugu kingumut qiviarnartupilussuuvoq. Meeqqat Danmarkimut atuariartortinneqartarnerat annertuupilussuarmik sunniuteqarpoq uagutsinnut, ilaammi angerlaqqinnikuunngillat. Anniaat qangali pigisara takkuteqqippoq, sukataarusunneralu annertuseqqilluni. Inuppalaartumik ataqatigiinnerput taamanikkut naak? Filmiliamit eqqortippunga. Siunissami filmi eqqaamaneqartuaannassaaq, Aqqaluk Lynge oqarpoq, apersorneqarninilu unitseriarlugu filmimi suliaqartut Inuk Silis Høegh aamma Emile Hertling Péronard eqillugit.

Malik Høegh killitsisimasoq
Kalaallit Nunaata John Lennoniat Malik Høegh filmi nersualaarpaa.

- Nuanneq! Attortinnaq, allamik oqarfiunngilaq. Killitsisimavunga. Taamani sukataarfigisavut filmimi eqqartorneqarmata qujamasuppunga, taamaasilluni siunissami 1970-kkunni susoqarsimanersoq puigorneqassanngilaq, Malik Høegh oqarpoq.

Sermitsiaq.AG pisumit assinik saqqummiissaaq.

Aviisini AGmi Sermitsiamilu 'Sume - mumisitsinerup nipaa' annertunerusumik atuarneqarsinnaavoq

Powered by Labrador CMS