Sume pillugu filmiliaq aningaasarsiutaanngilaq

Filmi soqutigineqarluartoq ’Sume - mumisitsinerup nipaa' arlaleriarluni filmfestivaalini takutinneqartareerpoq. Piviusulersaarusiamulli suliaqartut filmi aningaasarsiutiginngilaat.

Anorak Filmip malugisinnaalluarpaa filmi soqutigineqarluartoq. Nunat tamalaat filmfestivalimi Berlinalenimi Berlinimiittumi februaarimi takutinneqarpoq. Kisianni Anorak Film bankiminni tamanna malugisinnaanngilaat.

- Aningaasaqarneq eqqarsaatigissagaanni una aningaasarsiutaanngilaq. Filmfestivalini takutinneqaraangat 2.000 koruuninik akiliuteqartarput. Filmip takutinneqarnissaanut angalanernut akiliuteqartoqarneq ajorpoq tamatigungajak. Filmimut suliarinnittuusugut angalavallaarnavianngilagut, kisianni aamma ajunngilaq, Inuk Silis Høegh tusagassiuutinut nalunaarummi allappoq.

Avammut takutinnissaa pingaarnerpaasoq
Nangillunilu:

- Filmip sumiiffinni assigiinngitsuni takutinneqarnissaa pingaarnerpaavoq. Sumep Kalaallit Nunaatalu ukiuni kingullerni 40-ni ineriartornerat takutissallugu pingaarnersaatipparput. Nunani assigiinngitsuni filmi takutereeraangatsigu isiginnaartut ilaat aggertarput oqarlutillu Kalaallit Nunaat pillugu ilisimasaqarpallaarnatik.

’Sume - mumisitsinerup nipaa' Australiami, New Zealandimi, Ungarnimi, Ruslandimi Argentinamilu qaammatini tulliuttuni takutinneqarumaarpoq. Aamma ullut tamangajaasa nunanit allanit saaffiginnittoqartarpoq.

- Nunarsuatsinni Kalaallit Nunaata ilisimaneqarnera annertusaratsigu nuannaarutigaarput. Aamma Sumekkut nipilersortarnerat annertusiartorpoq, sumiiffiit ilaanni nipilersoriaasaat nuannarineqaqaaq, Inuk Silis Høegh oqarpoq.